মৰাণ, 7 ছেপ্তেম্বৰ :ডিব্ৰুগড়ৰ নাহৰকটীয়া বিধানসভা সমষ্টিৰ টিপাম ফাকিয়াল গাঁৱৰ 35 বছৰেও সম্পূৰ্ণ নোহোৱা এখন 30 খন বিচনাযুক্ত চৰকাৰী চিকিৎসালয় ৷ এই চিকিৎসালয়খনৰ বাবে সমস্যাত ভুগিছে 30 খনৰো অধিক গাঁৱৰ বাসিন্দাসকল ৷ কিয়নো আজিপৰ্যন্ত চিকিৎসা সেৱা আৰম্ভ নহ’ল এই চিকিৎসালয়খনত ৷
1986 চনতে 2 কোটি টকা ব্যয় সাপেক্ষে নিৰ্মাণ কৰা হৈছিল চিকিৎসালয়খন ৷ নিৰ্মাণৰ কাম সম্পূৰ্ণ হৈছিল ঠিকেই, কিন্তু চিকিৎসা সেৱা আৰম্ভ কৰিব লাগে বুলি এতিয়াও কাণসাৰ নাই চৰকাৰৰ বিয়াগোম স্বাস্থ্য বিভাগৰ(Health Department) ৷ এই অভিযোগ উত্থাপন কৰিছে স্থানীয় ৰাইজে ৷
চিকিৎসা সেৱা উপলব্ধ নথকা এক চৰকাৰী চিকিৎসালয় নাহৰকটীয়া সমষ্টিৰ টিপাম পঞ্চায়তৰ অন্তৰ্গত 30 খনৰো অধিক গাঁৱৰ ৰাইজক সকাহ দিয়াৰ বাবে স্থাপন কৰা হৈছিল এই চিকিৎসালয়খন ৷ চিকিৎসালয়খনৰ আধাৰশিলা স্থাপন কৰিছিল অগপৰ প্ৰথমখন চৰকাৰৰ দিনতেই মুখ্যমন্ত্ৰী প্ৰফুল্ল কুমাৰ মহন্তই(Prafulla Kumar Mahanta) ।
লগতে পঢ়ক:বৰপেটা অসামৰিক চিকিৎসালয়ত 50 টকাতে উপলব্ধ ক’ভিড ভেকচিন !
আধাৰশিলা স্থাপনৰ সুদীৰ্ঘ 23 বছৰৰ পাচত চিকিৎসালয়খনৰ নিৰ্মাণ কাৰ্য সম্পূৰ্ণ হৈছিল ৷ সম্পূৰ্ণ হোৱা চিকিৎসালয়খন মুকলি হোৱাৰ আশাৰে বাট চাইছিল গাঁৱৰ ৰাইজে ৷ কিন্তু এই অপেক্ষাই অতিক্ৰম কৰিলে সুদীৰ্ঘ 12 টা বছৰ ৷ কংগ্ৰেছ চৰকাৰৰ দিনত নিৰ্মাণ কাৰ্য সম্পূৰ্ণ হোৱা 30 খন বিচনাযুক্ত চিকিৎসালয়খন সম্প্ৰতি জহি-খহি যাবলৈ ধৰিছে ৷
কংগ্ৰেছৰ পিচত ৰাজ্যত দুবাৰকৈ পৰিৱৰ্তনকামী চৰকাৰ শাসনৰ গাদীত অধিষ্ঠিত হ’ল যদিও এইপৰ্যন্ত স্বাস্থ্য বিভাগৰ চকু নপৰিল টিপামৰ চিকিৎসালয়খন মুকলি কৰি ৰাইজক সকাহ দিবলৈ ৷ এই প্ৰতিবেদন প্ৰকাশৰ পিছত জহি-খহি যোৱা এই চিকিৎসালয়খন মুকলি কৰিবলৈ ড৹ হিমন্ত বিশ্ব শৰ্মা(Himanta Biswa Sarma) নেতৃত্বাধীন চৰকাৰৰ স্বাস্থ্য বিভাগৰ সময় হ’বনে নহয়, সেয়া লক্ষণীয় হ’ব ৷
লগতে পঢ়ক:তিনিমাহৰ অন্তত অভয়াকুটি হত্যাকাণ্ডৰ চাৰ্জশ্বীট দাখিল
