প্ৰথম পৰ্যায়ৰ মনোনয়নৰ অন্তিম দিনঃ শক্তি প্ৰদৰ্শনৰ ব্যাপক কুচকাৱাজ

অসমৰ পাঁচটা সমষ্টিৰ কেইবাগৰাকীও প্ৰাৰ্থীয়ে দাখিল কৰিব মনোনয়ন ৷ ৰাজনৈতিক মহলত চৰ্চা লাভ কৰা কেইবাগৰাকীও প্ৰাৰ্থীয়েই মনোনয়ন পত্ৰ দাখিলৰ সময়ত শক্তি প্ৰদৰ্শন কৰিবলৈ সাজু হৈ উঠিছে ৷

নিউজ ডেস্ক, 25 মাৰ্চ : প্ৰথম পৰ্যায়ৰ নিৰ্বাচনৰ বাবে মনোনয়ন দাখিলৰ আজি অন্তিম দিন ৷ ৰাজ্যৰ পাঁচটা সমষ্টিৰ প্ৰাৰ্থীয়ে আজি সম্পূৰ্ণ কৰিব নিজ-নিজ মনোনয়ন পত্ৰ দাখিলৰ কাম ৷ প্ৰথম পৰ্যায়ৰ নিৰ্বাচন অনুষ্ঠিত হ'বলগীয়া সমষ্টিকেইটা হৈছে - লখিমপুৰ, তেজপুৰ, যোৰহাট, ডিব্ৰুগড় আৰু কলিয়াবৰ ৷

1. সোমবাৰে মনোনয়ন দাখিলৰ অন্তিমটো দিনত কলিয়াবৰ সমষ্টিত অগম গণ পৰিষদৰ হৈ মনোনয়ন পত্ৰ দাখিল কৰিব মণিমাধৱ মহন্তই ৷ কলিয়াবৰ সমষ্টিৰ পৰা ইতিমধ্যেকংগ্ৰেছৰ হৈ মনোনয়ন দাখিল কৰিছে বৰ্তমানৰ সাংসদ গৌৰৱ গগৈয়ে ৷ চি পি আইৰ হৈ সমষ্টিটোত মনোনয়ন দাখিল কৰিছে কনক গগৈয়ে ৷ আনহাতে, কলিয়াবৰৰ পৰা নিৰ্দলীয় প্ৰাৰ্থী ভাস্কৰ শৰ্মায়ো ইতিমধ্যে দাখিল কৰিছে মনোনয়ন পত্ৰ ৷

2. লখিমপুৰ সমষ্টিত বিজেপি প্ৰাৰ্থী প্ৰদান বৰুৱাই সোমবাৰে দাখিল কৰিব মনোনয়ন ৷

সমষ্টিটোত কংগ্ৰেছৰ সাংসদীয় প্ৰাৰ্থী অনিল বৰগোহাঁয়েইতিমধ্যেই দাখিল কৰিছে মনোনয়ন পত্ৰ ৷ সমান্তৰালভাৱে চচিয়েলিষ্ট ইউনিটি চেণ্টাৰ অফ ইণ্ডিয়া (কমিউনিষ্ট )ৰ প্ৰাৰ্থী হেমকান্ত মিৰিয়েও দাখিল কৰিছে নিজৰ মনোনয়ন পত্ৰ ৷

3. তেজপুৰ সমষ্টিৰ পৰা সোমবাৰে বিজেপিৰ হৈ মনোনয়ন দাখিল কৰিব পল্লৱ লোচন দাসে ৷ অন্তিমটো দিনত কংগ্ৰেছৰ প্ৰাৰ্থী এম জি ভি কে ভানুৱেও দাখিল কৰিব মনোনয়ন পত্ৰ ৷ সমষ্টিটোৰ পৰা ইতিমধ্যেই মনোনয়ন দাখিল কৰিছে নিৰ্দলীয় প্ৰাৰ্থী জিয়াবুৰ ৰহমান খানে ৷

4. ডিব্ৰুগড় সমষ্টিৰ পৰা বিজেপি প্ৰাৰ্থী ৰামেশ্বৰ তেলীয়ে ইতিমধ্যেই দাখিল কৰিছে নিজ মনোনয়ন পত্ৰ ৷ আনহাতে কিছু বিসংগতিৰ বাবে পূৰ্বে মনোনয়ন দাখিলত ব্যৰ্থ হোৱা কংগ্ৰছী প্ৰাৰ্থী পৱন সিং ঘাটোৱাৰেও আজি দাখিল কৰিব মনোনয়ন পত্ৰ৷

5. যোৰহাট সমষ্টিৰ পৰা বিজেপি প্ৰাৰ্থী তপন গগৈয়ে আজি দাখিল কৰিব মনোনয়ন পত্ৰ ৷ সমষ্টিটোৰ পৰা কংগ্ৰেছ দলৰ হৈ ইতিমধ্যেই মনোনয়ন পত্ৰ দাখিল কৰিছে সুশান্ত বৰগোহাঁয়ে৷