মৰাণ,27মে’:চৌদিশে ক'ভিডৰ সংহাৰি ৰূপ । এই দুঃসময়তো একাংশ দালালে লুণ্ঠন চলাবলৈ এৰি দিয়া নাই । মৰাণৰ এখন গাঁৱৰ তেনে এক খবৰেই পোহৰলৈ আহিছে । খবৰ অনুসৰি, মৰাণৰ সমীপৰ খোৱাং বাঁহনি পথাৰ গাঁওখন কণ্টেইনমেণ্ট জ'নত আছিল । সেই অনুসৰি গাঁওখনৰ লোকসকললৈ আহিছিল চৰকাৰী সাহাৰ্য । এই সাহাৰ্যত ২ হাজাৰ টকাৰ সামগ্ৰী থাকিব লাগিছিল যদিও প্ৰায় ১ হাজাৰ ৩ শ মান টকাৰ সামগ্ৰীহে কণ্টেইনমেণ্টত থকা লোক সকলেপোৱা বুলি অভিযোগ কৰিছে ৷
উল্লেখযোগ্য যে, চাউল, দাইল, আলু, পিয়াজ, চাৰ্ফ, চাবোন, গাখীৰ, তেল আদি সামগ্ৰী ৰাইজে পাইছে যদিও চৰকাৰী হিচাপতকৈ বহু গুণে কম । কেৱল ইমানেই নহয় পাচলিৰ নামত দিছে এটা ৰঙালাও । যাৰ মূল্য ২৩৫ টকা হৈছেগৈ বুলি ৰাইজে অভিযোগ কৰিছে । সামগ্ৰী সমূহ বিতৰণ কৰিছিল গাঁৱৰে ৰঞ্জিত ফুকন আৰু তৰুণ চেতিয়া নামৰ ব্যক্তি দুজনে । বিতৰণৰ সময়ত উপস্থিত আছিল মৰাণৰ ভাৰপ্ৰাপ্ত চক্ৰ বিষয়া পাপৰি বৰগোঁহাই, স্থানীয় লাট গাঁওবুঢ়া আৰু পঞ্চায়ত প্ৰতিনিধি ।