জয়পুৰত অবৈধ কয়লাৰ ৰমৰমীয়া বেহা

আৰক্ষীৰ অভিযানত উদ্ধাৰ বৃহৎপৰিমাণৰ কয়লা ভৰ্তি বেগ ৷

জয়পুৰ, 30 ছেপ্তেম্বৰ: ডিব্ৰুগড় জিলাৰ ইতিহাস প্ৰসিদ্ধ জয়পুৰত এতিয়া ব্যাপক হাৰত চলিছে অবৈধ কয়লাৰ ৰমৰমীয়া বেহা ৷ অঞ্চলটোৰ ঐতিহাসিক টিপাম পাহাৰ খান্দি কয়লাৰ অবৈধ ৰমৰমীয়া বেহা চলাই আহিছে একাংশ অসাধু কয়লা মাফিয়াই ৷ যাৰ ফলতে বিগত কিছুদিন ধৰি আৰক্ষীৰ জালত পৰিছে এজনৰ পাছত আনজন অবৈধ কয়লা ব্যৱসায়ী ৷ সোমবাৰে জয়পুৰ আৰক্ষী চকীৰ বিষয়া নিত্যানন্দ সোনোৱালৰ নেতৃত্বত গোপন সূত্ৰৰ তথ্যৰ পম খেদি এটা দলে অভিযান চলাই তৰাজান বাগানৰ সমীপৰ চৰাইপুঙৰ পৰা জব্দ কৰে 50ৰো অধিক কয়লাভৰ্তি বেগ ৷ ইফালে আৰক্ষী অহাৰ উমান পাই আন অবৈধ কয়লা ব্যৱসায়ী কেইজনে পলায়ন কৰে যদিও আৰক্ষীয়ে কয়লা নিবলৈ অহা ডাম্পাৰ গাড়ীখনৰ লগতে গাড়ী চালক আৰু হেণ্ডিমেনক আটক কৰিবলৈ সক্ষম হয় ৷