নাহৰকটীয়া,7 আগষ্ট:নাগৰিকত্ব সংশোধনী আইন বাতিলক কেন্দ্ৰ কৰি পুনৰ ৰাজ্যত আৰম্ভ হৈছে প্ৰতিবাদ ৷ বিতৰ্কিত উক্ত আইনখন বাতিল কৰিবলৈ শুকুৰবাৰে অসম জাতীয়তাবাদী যুৱ ছাত্ৰ পৰিষদৰ নাহৰকটীয়া আঞ্চলিক সমিতিয়ে প্ৰদৰ্শন কৰে মানৱ শৃংখল ৷ নাহৰকটীয়া উচ্চতৰ মাধ্যমিক বিদ্যালয়ৰ সন্মুখত আয়োজিত উক্ত প্ৰতিবাদী কাৰ্যসূচীত অংশগ্ৰহণ কৰে শতাধিক লোকে ৷
প্ৰতিবাদী কাৰ্যসূচীটোত অংশগ্ৰহণ কৰি প্ৰতিবাদকাৰীসকলে অসম চৰকাৰ মুৰ্দাবাদ, বিজেপি চৰকাৰ মুৰ্দাবাদ, জাতিধ্বংসী নাগৰিকত্ব সংশোধনী আইন বাতিল কৰক, সৰ্বানন্দ সোণোৱাল মুৰ্দাবাদ আদি বিভিন্ন প্ৰতিবাদী শ্লোগানেৰে মুখৰিত কৰে নাহৰকটীয়াৰ আকাশ-বতাহ ৷ প্ৰতিবাদস্থলীৰ পৰা সংগঠনটোৰ নাহৰকটীয়া আঞ্চলিক সমিতিৰ সভাপতি গৌৰাংগ গগৈয়ে শীঘ্ৰে জাতিধ্বংসী নাগৰিকত্ব সংশোধনী আইনখন বাতিল কৰিবলৈ দাবী জনাই চৰকাৰক ৷ অন্যথা পৰৱৰ্তী সময়ত এই আন্দোলন অধিক তীব্ৰতৰ কৰি তোলাৰ হুংকাৰ প্ৰদান কৰে সংগঠনটোৰ নেতাসকলে ৷
