নাহৰকটীয়া, 24 জুন : ৰাজ্যজুৰি অব্যাহত থকা ক'ভিডৰ ভয়াৱহতা তথা বানৰ মাজতে নাহৰকটীয়াৰ চাচনীৰ হালোৱা গাঁৱত সংঘটিত হৈছে এক চাঞ্চল্যকৰ হত্যাকাণ্ড ৷ প্ৰাপ্ত খবৰ অনুসৰি, বুধবাৰে নিশা সংঘটিত হয় এই চাঞ্চল্যকৰ হত্যাকাণ্ডটো ৷ পাৰিবাৰিক কন্দলৰ পৰিপ্ৰেক্ষিতেত প্ৰাণ গ'ল সীমান্ত গগৈ নামৰ এজন যুৱকৰ ৷ এই ঘটনাই সমগ্ৰ অঞ্চলটোতে সৃষ্টি কৰিছে তীব্ৰ চাঞ্চল্যৰ ৷
ঘটনাৰ বিৱৰণী অনুসৰি, বুধবাৰে নিশা হালোৱা গাঁৱৰ নিবাসী দিগন্ত গগৈয়ে একমাত্ৰ পুত্ৰ সীমান্ত গগৈৰ সৈতে ঘৰুৱা কাম-কাজৰ কথাক লৈ বাক-বিতণ্ডাৰ সৃষ্টি কৰে ৷ ঠিক তেনে সময়তে ঘৰৰ কাষতে থকা দিগন্ত গগৈৰ ভাতৃ প্ৰয়াত চেনিৰাম গগৈৰ পুত্ৰ তথা সীমান্ত গগৈৰ দদায়েকৰ পুত্ৰ ভাতৃ পুলিন গগৈ উপস্থিত হৈ কিহৰ বাবে হৈ-হাল্লা কৰা বুলি গালি-গালাজ পাৰি বুজনি দিয়াৰ চেষ্টা কৰে ৷ কিন্তু পৰিস্থিতি অধিক অৱনতি ঘটাত এডাল জেওৰা খুটিৰে সীমান্ত গগৈক প্ৰহাৰ কৰে ভাতৃ পুলিন গগৈয়ে ৷