ডিব্ৰুগড়, 25 ডিচেম্বৰ : দেশৰ পাঁচখন ৰাজ্যৰ তালিকাত অসমৰ নাম অন্তৰ্ভুক্ত কৰিবলৈ ৰাজ্য চৰকাৰে ৰঙীণ সপোন দেখুৱাই ৰাইজৰ বাবে এখনৰ পাচত আন এখন আঁচনি ঘোষণা কৰিছে । বিকশিত ভাৰত সংকল্প যাত্ৰা কৰি শাসকীয় মন্ত্ৰী-বিধায়কে পঞ্চায়তে পঞ্চায়তে গৈ কেন্দ্ৰীয় অথবা ৰাজ্য চৰকাৰৰ আঁচনিসমূহ অৱগত কৰিছে ৰাইজক ।
কিন্তু চৰকাৰৰ উন্নয়ন আৰু বিকশিত ভাৰত শ্লোগানৰ বিপৰীত ছবি দেখিবলৈ পোৱা গৈছে নাহৰকটীয়াত ৷ কোটি কোটি টকা ব্যয় সাপেক্ষে ৰূপায়ন কৰা জল জীৱন আঁচনিয়ে ঢুকিয়ে পোৱা নাই নাহৰকটীয়াৰ একাংশ ৰাইজক ৷ যেন ধোঁৱা চাঙত উঠিছে জল জীৱন আঁচনি ৷ জল আছে কিন্তু জলেহে ৰাইজক দিব পৰা নাই জীৱন ৷
সেয়ে বিশুদ্ধ খোৱা পানীৰ অভাৱত হাহাকাৰ কৰিবলগীয়া হৈছে নাহৰকটীয়াৰ 2 নং শিলগ্ৰান্টৰ ৰাইজে ৷ আনহাতে উক্ত আঞ্চলটোত পানী যোগান কেন্দ্ৰ এটা আছে ৷ কিন্তু দীৰ্ঘদিন ধৰি মেৰামতিৰ অভাৱত বিকল হৈ পৰিছে কেন্দ্ৰটো । যাৰ ফলত দুৰ্ভোগ ভুগিবলগীয়া হৈছে শিলগ্ৰান্টবাসী ৰাইজে । বিগত 7-8 মাহ ধৰি পানী যোগান আঁচনি কেন্দ্ৰটো অচল হৈ পৰাত এটুপি বিশুদ্ধ খোৱাপানীৰ বাবে হাহাকাৰ কৰিবলগীয়া হৈছে শিলগ্ৰান্টবাসী ৰাইজে ।