ডিব্ৰুগড়,14 জুন : বনভোজ থলীত বনভোজ খাই মানুহে পেলাই যোৱা প্লাষ্টিকৰ বটল (Waste Plastic) বিগত ডেৰমাহ ধৰি বুটলিছিল তেওঁ । মুঠ 1600 টা পেলনীয়া প্লাষ্টিকৰ বটলেৰে এখন নাও সাজি উলিয়াইছে এইজন যুৱকে । নাওখন সজাৰ মূল বিষয়বস্তুটো হৈছে ‘প্লাষ্টিক মুক্ত ব্ৰহ্মপুত্ৰ’ (Plastic Free Brahmaputra) । প্লাষ্টিকৰ বটলৰ নাও লৈ তেওঁ যাত্ৰা কৰিব নদীদ্বীপ মাজুলীলৈ । এই মহৎ কামৰ আঁৰৰ যুৱকজন হৈছে ডিব্ৰুগড়ৰ বগীবিলত নদী পৰ্যটনৰ সম্ভাৱনা গঢ়ি তোলা ‘ব্ৰহ্মপুত্ৰৰ মুকুটা’ (Brahmaputra Mukuta) শীৰ্ষক বিশাল নৌকাৰ স্বত্বাধিকাৰী বুমণি গগৈ ওৰফে ধীৰাজ বিকাশ গগৈ ।
শেহতীয়াকৈ নৌকা ‘ব্ৰহ্মপুত্ৰৰ মুকুটা’ৰ সৈতে দিনে-নিশাই জড়িত হৈ থকা বুমণি গগৈয়ে সমীপৰে বনভোজ থলী বগীবিলত বনভোজ খাই ৰাইজে পেলাই যোৱা প্লাষ্টিকৰ বটলসমূহ বুটলি সেই বটলেৰে এই নাওখন সাজি উলিয়াইছে ৷ ‘প্লাষ্টিক মুক্ত ব্ৰহ্মপুত্ৰ’ গঢ়াৰ এক লক্ষ্যৰে বটলৰ নাও চলাই ব্ৰহ্মপুত্ৰৰ মাজেৰে নদীদ্বীপ মাজুলীলৈ গৈ ৰাইজক এই বাৰ্তা দিয়াৰ প্ৰয়াস কৰাৰ চিন্তা কৰিছে যুৱকজনে । উল্লেখ্য যে, কেৱল ব্ৰহ্মপুত্ৰই নহয় বান অধ্যুষিত এলেকাটো পেলনীয়া প্লাষ্টিকৰ বটলেৰে সজা নাও বানাক্ৰান্তই ব্যৱহাৰ কৰিব পাৰিব বুলি উল্লেখ কৰে গগৈয়ে ।