ডিব্ৰুগড়,10 জুলাই:পুনৰ সংহাৰী ৰূপ ধাৰণ কৰিছে ব্ৰহ্মপুত্ৰ নদীয়ে ৷ শুকুৰবাৰে দিনৰ ভাগৰ পৰা বিপদসীমাৰ ওপৰেৰে ফেনে-ফোটোকাৰে বাঢ়ি অহা ব্ৰহ্মপুত্ৰৰ পানীয়ে ইতিমধ্যে ডিব্ৰুগড় চহৰলৈ ভয়াৱহ ভাবুকি কঢ়িয়াই আনিছে ৷ চহৰখনৰ মাইজানৰ পৰা বগীবিললৈ প্ৰায় 10 কিল’মিটাৰ অঞ্চল বাঢ়নী পানীয়ে প্লাৱিত কৰাৰ ফলত আতংকিত হৈ পৰিছে জন সাধাৰণ । ইতিমধ্যে শতাধিক গৃহ পানীত বুৰ যোৱাৰ লগতে ডিব্ৰুগড় চহৰৰ দাঁতি কাষৰীয়া কেইবাঠাইতো ওফন্দি উঠিছে ব্ৰহ্মপুত্ৰ ।
উল্লেখ্যে যে,চহৰখনৰ মোহনাঘাটৰ সমীপৰ ভঙা আলি অঞ্চলৰ প্ৰায় 15 টাকৈ স্থানত ভয়াৱহভাৱে ওফন্দি উঠিছে নদীখন ৷ ফলত তীব্ৰ আতংকৰ সৃষ্টি হৈছে স্থানীয় ৰাইজৰ মাজত । লগতে নিশাৰ ভাগলৈ পৰিস্থিতিৰ অধিক অৱনতি ঘটাৰ আশংকা প্ৰকাশ কৰা হৈছে ৷ পৰিৱেশৰ প্ৰতি লক্ষ্য ৰাখি বিভাগীয় কৰ্তৃপক্ষই পানীৰ বুৰ ওলোৱা স্থানত কেইটামান বালিৰ বস্তাৰে ঢাকি দায়িত্ব সামৰাৰ অভিযোগ উত্থাপন কৰিছে স্থানীয় ৰাইজে ৷ সম্প্ৰতি চহৰখনৰ সমীপেৰে বৈ যোৱা ব্ৰহ্মপুত্ৰৰ পানীয়ে 105.70 ৰ বিপৰীতে 105.73 মিটাৰ ওপৰেৰে বৈছে । যিকোনো মুহুৰ্ততে পৰিস্থিতি শোচনীয় হোৱাৰ আশংকা প্ৰকাশ কৰা হৈছে যদিও বিষয়টো সম্পৰ্কে এই পৰ্যন্ত খবৰ নাই বিধায়ক প্ৰশান্ত ফুকনৰ ৷
লগতে চাওকঃমুকালমুৱাৰ দুই পৃথক স্থানত চুৰিকাণ্ড