ডিব্ৰুগড়, 15 আগষ্ট : বৃহত্তৰ ডিব্ৰুগড় প্ৰেছ ক্লাৱে গৰকিলে গৌৰৱোজ্জল 16 টা বৰ্ষ ৷ কেৱল সাংবাদিকতাতেই দ্বায়বদ্ধতাৰ পৰিসীমা য'ত সমাপ্ত নহয় । তেনে এক ব্যতিক্ৰমী অনুষ্ঠান ৰূপে চিহ্নিত হৈ অহা "বৃহত্তৰ ডিব্ৰুগড় প্ৰেছ ক্লাৱে" জয়যাত্ৰাৰ 16 টা বৰ্ষ অতিক্ৰম কৰি উদযাপন কৰে বৰ্ষপূৰ্তি । প্ৰতিবাৰৰ দৰে এইবাৰো ক্লাৱৰ ষষ্ঠদশ বাৰ্ষিক প্ৰতিষ্ঠা দিৱসৰ কাৰ্যসূচীত সাংবাদিকতা জীৱনত আগবঢ়োৱা অৱদান আৰু আন কেইবাটাও দিশত উত্তৰণ ঘটোৱা কেইবাগৰাকীও লোকক জনোৱা হয় বিশেষ সম্বৰ্ধনা ।
উল্লেখ্য যে, বৃহত্তৰ ডিব্ৰুগড় প্ৰেছ ক্লাৱে 16 টা বৰ্ষ অতিক্ৰম কৰি 17 সংখ্যক বৰ্ষত ভৰি দিলে । ডিকমৰ পৰা খোৱাঙলৈকে কৰ্মৰত সাংবাদিক সকলক লৈ গঠন হোৱা ডিব্ৰুগড় জিলাৰ অন্যতম সাংবাদিক সংগঠন বৃহত্তৰ ডিব্ৰুগড় প্ৰেছ ক্লাৱৰ এই শুভ মূহুৰ্তত "প্ৰতিষ্ঠা দিৱস আৰু সম্বৰ্ধনা" অনুষ্ঠানত উপস্থিত থাকি অনুষ্ঠানটো সফল কৰি তোলে ক্লাৱৰ সভাপতি মনজিৎ বৰা, কাৰ্যকৰী সভাপতি আদিত্য শইকীয়া, সাধাৰণ সম্পাদক ৰাতুল বুঢ়াগোহাঁই, ক্লাৱৰ প্ৰতিষ্ঠাপক সভাপতি ৰাজীৱ বৰগোহাঞি, শিক্ষাবিদ তথা সাহিত্যিক ড৹ শশীকান্ত শইকীয়া সহ ক্লাৱৰ আন বহু বিষয়ববীয়াই ।