ডিব্ৰুগড়, ছেপ্টেম্বৰ 23 : শনি লাগিছে অসম আৰক্ষীত৷ বিগত পোন্ধৰ দিনত কেইবাটাও ঘটনাই নাক কাটিছে অসম আৰক্ষীৰ৷ দৰঙৰ বুঢ়া আৰক্ষী কাণ্ড মাৰ নৌ যাওঁতেই বৰপেটাতো আৰক্ষীৰ বিৰুদ্ধে মহিলাক নিৰ্যাতন চলোৱাৰ অভিযোগ উত্থাপিত হৈছিল ৷ কেৱল সেইয়াই নহয় চৰ্চালৈ আহিছিল কোকৰাঝাৰৰ আৰক্ষী অধীক্ষক ৰাজেন সিঙ ৷ কোকৰাঝাৰৰ হোটেল গৌৰাংভেলীত জিলা দণ্ডাধীশ শৈলেন দাসক চোঁচৰাই পেলাইছিল ৰাজেন সিঙে ৷
এইবাৰ ডিব্ৰুগড়ত মাছ বেপাৰীৰ পৰা ধন দাবী কৰি ৰঙাঘৰত সোমাল অসম আৰক্ষীৰ এজন গৃহৰক্ষী জোৱান ৷ ইতিমধ্যে চ'ছিয়েল মিডিয়াত ভাইৰেল হৈ পৰিছে ধন দাবীৰ দৃশ্য ৷ বিচৰা অনুসৰি ধন নিদিয়াত মাছ বেপাৰীক অশ্ৰাব্য গালি গালাজো পাৰে গৃহৰক্ষী সঞ্জয় গোঁহায়ে ৷ উল্লেখ্য যে, ডিব্ৰুগড়ৰ লাহোৱাল থানাত কৰ্মৰত অভিযুক্ত গৃহৰক্ষীজন ৷ এই ঘটনাৰ পাচত আৰক্ষীয়ে তৎপড়তাৰে গ্ৰেপ্তাৰ কৰে সঞ্জয় গোঁহাইক ৷ অসম আৰক্ষীক লজ্জানত কৰা এনে কাৰ্যৰ বাবে কঠোৰ ব্যৱস্থা গ্ৰহণ কৰি অভিযুক্ত সঞ্জয়ক গ্ৰেপ্তাৰ কৰি ন্যায়ালয়লৈ প্ৰেৰণ কৰিছে ডিব্ৰুগড় আৰক্ষীয়ে ।