গুৱাহাটী, ৮ ডিচেম্বৰঃ ৰাজ্যৰ প্ৰান্তে প্ৰান্তে এতিয়া অনুষ্ঠিত হৈছে গ্ৰন্থমেলা । গ্ৰন্থ অধ্যয়নৰ এক নতুন পৰিৱেশ সৃষ্টি কৰাৰ লক্ষ্যৰে গ্ৰন্থমেলা সমূহৰ বাকৰিত উন্মোচন হৈছে বহু লেখকৰ নতুন গ্ৰন্থ । প্ৰিয় গ্ৰন্থখন বিচাৰি গ্ৰন্থমেলাৰ বাকৰিত পাঠক আৰু গ্ৰন্থপ্ৰেমীয়ে ভিৰ কৰিছে । ইয়াৰ মাজতে আজিৰে পৰা ডিব্ৰুগড় মিলনজ্যোতি সংঘৰ উদ্যোগত আৰম্ভ হ'ল ত্ৰয়োদশ ডিব্ৰুগড় গ্ৰন্থমেলা ।
শুকুৰবাৰে অসম সাহিত্য সভাৰ প্ৰাক্তন সভাপতি ডাঃ ধ্ৰুৱজ্যোতি বৰাই গ্ৰন্থমেলা মুকলি কৰে । ইয়াৰ পিছতেই ডিব্ৰুগড় ত্ৰয়োদশ গ্ৰন্থমেলা শুভাৰম্ভ হয় । মিলনজ্যোতি সংঘৰ উদ্যোগত ত্ৰয়োদশ ডিব্ৰুগড় গ্ৰন্থমেলা শুভ উদ্বোধন কৰি অসম সাহিত্য সভাৰ প্ৰাক্তন সভাপতি ডাঃ ধ্ৰুৱজ্যোতি বৰাই কয়, "গ্ৰন্থমেলা সমূহ আমাৰ সমাজ জীৱনৰ গুৰুত্বপূৰ্ণ বিষয়বস্তু । গ্ৰন্থ মেলাক কেন্দ্ৰ কৰিয়েই নতুন নতুন গ্ৰন্থ প্ৰকাশ পায় । গ্ৰন্থমেলা সমূহে অসমীয়া সাহিত্য বিকাশ ক্ষেত্ৰত অৰ্থৱহ আৰু গুৰুত্বপূৰ্ণ ভূমিকা পালন কৰি আহিছে । "