মৰাণ, 11 জুলাই : সমগ্ৰ ৰাজ্যতে ক’ভিড পৰিস্থিতিৰ বাবে চৰকাৰে বলবৎ কৰি থোৱা সান্ধ্য আইনৰ সুৰুঙা লৈ একাংশ অসাধু ব্যৱসায়ীয়ে অব্যাহত ৰাখিছে কু-কাৰ্য । তাৰ মাজতে চৰাইদেউ জিলাৰ সাপেখাতীৰ বিভিন্ন অঞ্চলৰ পৰা ধাৰাবাহিকভাৱে কিছু দিনৰ পৰা গৰু চুৰি কাৰ্য সংঘটিত হৈ আহিছে । বিগত ২৮ জুনত ৰহনৰ পৰা চুৰি কৰি নিয়া হৈছিল দুটাকৈ গৰু । উক্ত ঘটনাৰ এজাহাৰৰ ভিত্তিত চুৰি গৰুৰ সন্ধানত ২৯ জুনৰ নিশা সাপেখাতী আৰক্ষী থানাৰ ভাৰপ্ৰাপ্ত আৰক্ষী বিষয়া সুৰেশ দত্ত আৰু দ্বিতীয় আৰক্ষী বিষয়া আহোং পানমেৰ বিশেষ তৎপৰতাত অসম অৰুণাচল সীমান্তবৰ্তী কানুবাৰীত আৰক্ষীয়ে দুই গৰু চোৰক কৰায়ত্ব কৰিছিল ।
তাৰ সমান্তৰালভাৱে, পুনৰ ৯ জুলাইৰ নিশা সাপেখাতী আৰক্ষী থানাৰ ভাৰপ্ৰাপ্ত আৰক্ষী বিষয়া সুৰেশ দত্তৰ তৎপৰতাত তিনিটাকৈ কুখ্যাত গৰু চুৰক আটক কৰিবলৈ সক্ষম হয় । জানিব পৰা মতে অৰুণাচল সীমান্তৱৰ্তী আৰক্ষী তালাচী চকীত বৰটিমনৰ নিবাসী পাগু মাঝিৰ পুত্ৰ মংগল মাঝিক দুজনী গৰু অৰুণাচললৈ খেদি নিয়া অৱস্থাত আটক কৰি সোধ পোচ কৰাত বৰটিমন বাগিছাৰ সমীপৰ বিচমিল্লা খানৰ পুত্ৰ আকবৰ খানে পঠিওৱা বুলি জনায় । ইয়াৰ উপৰিও গৰু বিক্ৰীৰ ৰচিদ গৰুৰ লগত মিল নথকাত আৰক্ষীৰ সন্দেহ হোৱাত লগে লগে বিচমিল্লা খানক আটক কৰি সোধ-পোচ কৰে ।