ডিব্ৰুগড়, 29 ডিচেম্বৰ:ইতিমধ্যেই বিশ্বৰ ভিন্ন প্ৰান্তৰ লগতে দেশতো উন্মেষ ঘটিছে কৰ'ণা মহামাৰীৰ নতুন সংক্ৰমণৰ ৷ তেনে স্থলত পূৰ্বতকৈয়ো অধিক কটকটীয়া কৰি তোলাৰ সময় আহি পৰিছে কৰ'ণাৰ প্ৰট'কলসমূহ ৷ কিন্তু তাকে নকৰি এক সম্পূৰ্ণ ওলোটা দৃশ্যহে পৰিলক্ষিত হ'ল ডিব্ৰুগড়ৰ মোহনবাৰী বিমান বন্দৰত ৷
মোহনবাৰী বিমান বন্দৰত উলংঘা ক'ভিড প্ৰট'কল বিমান বন্দৰটোত যাত্ৰী সকলৰ স্বাস্থ্য পৰীক্ষা কৰিছে ঠিকেই, কিন্তু কৰ্তৃপক্ষৰ মাজত দেখিবলৈ পোৱা নগ'ল কৰ'ণা মহামাৰীৰ বাবে থাকিবলগীয়া কণমানো সজাগতা ৷ যাত্ৰীতো বাদেই, খুদ কৰ্তৃপক্ষৰ লোকৰ মুখতো দেখিবলৈ পোৱা নগ'ল এখন মাস্ক ৷ মাস্ক অবিহনেই কাউণ্টাৰত থকা কৰ্তৃপক্ষৰ লোকে সংগ্ৰহ কৰি গৈছে ইজনৰ পাচত সিজন যাত্ৰীৰ ক'ভিড পৰীক্ষাৰ নমুনা ৷
খুদ কৰ্তৃপক্ষৰ লোকৰ মুখতো দেখিবলৈ পোৱা নগ'ল এখন মাস্ক নতুনকৈ পুনৰ আগতকৈ অধিক সক্ৰিয় হৈ পৰিছে মহামাৰী বিধৰ নৱ সংক্ৰমণ ৷ যাৰ বাবে চৰকাৰে বাৰম্বাৰ সতৰ্কবাণী প্ৰদান কৰি আহিছে ৰাইজক ৷ তেনে ক্ষেত্ৰত মোহনবাৰী বিমানবন্দৰৰ ভয়াৱহ দৃশ্যই বাৰুকৈয়ে শংকিত কৰি তুলিছে সচেতন মহলক ৷ কিয়নো বিমান বা ৰে'লযোগে প্ৰৱেশ কৰা বহিঃৰাজ্য তথা বহিঃৰাষ্ট্ৰৰ লোকৰ পৰা কৰ'ণা মহামাৰী বিয়পাৰ সম্ভাৱনা অধিক ৷
আনহাতে ডিব্ৰুগড়ৰ বিমান বন্দৰত নাকত কপাহ সংলগ্ন পাইপ ভৰাই নমুনা সংগ্ৰহ কৰোতেও যাত্ৰীসকলে যথেষ্ট কষ্টৰ সন্মুখীন হোৱা বুলি অভিযোগ উত্থাপন হৈছে ৷ এই প্ৰক্ৰিয়াৰ দ্বাৰা নাকৰ ভিতৰত দুখ পোৱাৰ সম্ভাৱনা অধিক প্ৰৱল বুলি জানিবলৈ দিয়ে ভুক্তভোগী ৰাইজে ৷ উল্লেখ্য যে, বহু যাত্ৰীয়ে ইতিমধ্যে বিমান বন্দৰত থকা কৰ'ণাৰ প্ৰট'কলৰ অভাৱ আৰু নমুনা সংগ্ৰহ প্ৰক্ৰিয়াৰ বিসংগতি সম্পৰ্কে জিলা প্ৰশাসনক গুৰুত্ব দিবলৈ অনুৰোধ জনাইছে ৷
লগতে পঢ়ক:শোণিতপুৰত কোভিড ১৯ প্ৰতিষেধকৰ অনুশীলন সমাপ্ত
