ডিব্ৰুগড়, 6 চেপ্তেম্বৰ:আৰক্ষীৰ জালত বনকৰা শিশুক নিৰ্যাতনৰ অভিযোগত অভিযুক্ত চিকিৎসক সিদ্ধি প্ৰসাদ দেউৰী আৰু তেওঁৰ অধ্যাপিকা পত্নী ডঃ মিতালী কোঁৱৰ ৷ শনিবাৰে নিশা নগাঁও জিলাৰ ৰহা টোলগেটৰ পৰা আৰক্ষীয়ে গ্ৰেপ্তাৰ কৰে দুয়োজন অভিযুক্তক ৷ AS-06 V-3839 নম্বৰৰ ইন'ভা বাহনেৰে ডিব্ৰুগড় অভিমুখে আহি থকাৰ সময়তে ৰহাত নগাঁও আৰু ডিব্ৰুগড় আৰক্ষীৰ এটা যৌথ দলে গ্ৰেপ্তাৰ কৰে দুয়ো অভিযুক্তক ৷ আৰক্ষীয়ে জানিবলৈ দিয়া অনুসৰি, আটকাধীন দম্পতীয়ে আৰক্ষীৰ চকুত ধূলি দি আত্মগোপন কৰি আছিল পশ্চিম বংগৰ নিউ জলপাইগুৰিত ৷ ডিব্ৰুগড় আৰক্ষীয়ে তথ্য লাভ কৰাৰ উমান পোৱাৰ লগতে সংবাদ মাধ্যমত ধাৰাবাহিকভাৱে প্ৰচাৰিত বাতৰিৰ বাবে তেওঁলোক ঘূৰি আহিছিল অসমলৈ ৷
উল্লেখ্য যে, যোৱা 31 আগষ্টত তেওঁলোকৰ বাসগৃহত বনকৰা হিচাপে থকা এটি 12 বছৰীয়া কিশোৰৰ দেহত উতলা গৰম পানী ঢালি অকথ্য নিৰ্যাতন কৰাৰ অভিযোগ উত্থাপন হৈছিল এই দম্পতীৰ বিৰুদ্ধে ৷ শিশুটিয়ে নিজ মুখেৰে সংবাদ মাধ্যমৰ আগত স্বীকাৰ কৰিছিল সেই কথা ৷ পৰৱৰ্তী সময়ত শিশু কল্যাণ সমিতিয়ে নিৰ্যাতনৰ বলি হোৱা শিশুটিক উদ্ধাৰ কৰি আৰক্ষীক সমগ্ৰ বিষয় উল্লেখ কৰি সেই সন্দৰ্ভত এক গোচৰ ৰুজু কৰিছিল ৷ তাৰ পাচতে ডিব্ৰুগড়ৰ পৰা পলায়ন কৰিছিল অভিযুক্ত দম্পতীয়ে ৷