মৰাণ, ৪ মে’:ডিব্ৰুগড় জিলাৰ মৰাণৰ খোৱাঙত ধুমুহাত গছ পৰি মৃত্যু হোৱা লোকজনৰ পৰিয়ালক ৪ লাখ টকাৰ চেক প্ৰদান কৰিলে মন্ত্ৰী যোগেন মহনে । মৰাণৰ সমীপৰ খোৱাঙৰ ১ নং দিখাৰী কিনাৰ চাংমাই গাঁৱত মঙলবাৰে বিয়লি অহা বিধ্বংসী ধুমুহাত গছ পৰি মৃত্যু হোৱা সুখেশ্বৰ গগৈ নামৰ লোকজনৰ পৰিয়ালক বুধবাৰে ৪ লাখ টকাৰ চেক প্ৰদান কৰে মন্ত্ৰী যোগেন মহনে (Cheque handed over by Jogen Mohan at Khowang)। মন্ত্ৰীগৰাকীয়ে বুধবাৰে বিয়লি মৃতকৰ পৰিয়ালৰ হাতত এই চেকখন প্ৰদান কৰে । মন্ত্ৰীগৰাকীৰ লগত পৰিয়ালটোৰ ওচৰত উপস্থিত থাকে বিধায়ক চক্ৰধৰ গগৈ, মৰাণ ৰাজহ চক্ৰ বিষয়া আৰু কেইবাগৰাকী বিশিষ্ট ব্যক্তি ।
উল্লেখযোগ্য যে মঙলবাৰে বিয়লি অহা ধুমুহা বৰষুণৰ মাজতে গৰু বিচাৰি যাওঁতে এজোপা প্ৰকাণ্ড গছ গাত পৰাত থিতাতে মৃত্যু হৈছিল লোকজনৰ । বুধবাৰে লোকজনৰ মৃতদেহ মৰণোত্তৰ পৰীক্ষাৰ অন্তত গাঁওবাসীয়ে সৎকাৰ কৰে । বিগত কিছুদিন ধৰি ৰাজ্যৰ ভিন্ন প্ৰান্তত প্ৰকৃতিয়ে তাণ্ডৱ ৰূপ ধাৰণ কৰিছে (Heavy storm in Assam) ৷ ৰাজ্য়ৰ কেইবাখনো জিলাত প্ৰৱল ধুমুহা আৰু শিলাবৃষ্টিয়ে ব্যাপক ক্ষতি সাধন কৰিছে ৷ ডিব্ৰুগড় জিলাতো চলিছে বৰদৈচিলাৰ তাণ্ডৱ । জিলাখনৰ খোৱাঙত প্ৰকৃতিৰ ৰুষ্ট ৰূপে ত্ৰাসিত কৰিছে ৰাইজক (Heavy storm in Dibrugarh) ৷ খোৱাঙৰ কেইবাটাও অঞ্চলত মঙলবাৰে বিয়লি অহা প্ৰচণ্ড ধুমুহা বৰষুণে তচনচ কৰি থৈ গৈছে খেতিপথাৰৰ লগতে গৃহ (Heavy Storm and hailstorm at Khowang) ৷