দলঙত বাঁহৰ ৰেলিং লগায়েই দায়িত্ব সামৰিছে গেমনে

দীৰ্ঘদিনৰ পৰা লোকনিৰ্মাণ বিভাগৰ জৰাজীৰ্ণ পথে ভোগাইছে ডিব্ৰুগড়বাসীক ৷ জিলাখনৰ মাজেৰে যোৱা 37 নং ৰাষ্ট্ৰীয় ঘাইপথৰ কেইবাখনো দলং মেৰামতি কৰিবলগীয়া আছিলে যদিও কোনো গুৰুত্ব নিদিলে বিভাগটোৱে ৷ যাৰ ফলত অতি বিপদজনক হৈ পৰিছে গেমন ইণ্ডিয়া নামৰ নিৰ্মাণকাৰী সংস্থাটোৱে নিৰ্মাণ কৰা খোৱাঙৰ সমীপৰ দলংখন ৷

মৰাণ,17 মে':লোকনিৰ্মাণ বিভাগৰ জৰাজীৰ্ণ পথে দীৰ্ঘদিনৰ পৰা জীয়াতু ভোগাইছে ডিব্ৰুগড়বাসীক ৷ পৰিৱৰ্তনৰ প্ৰতিশ্ৰুতি দিয়া চৰকাৰৰ দিনত লোকনিৰ্মাণ পথৰ লগতে গ্ৰামাঞ্চলৰ পথসমূহৰ কিছু উন্নয়ন হ'ল যদিও জিলাখনৰ মূল পথসমূহ আজিও উন্নত নহ'ল ৷ জিলাখনৰ মাজেৰে যোৱা 37 নং ৰাষ্ট্ৰীয় ঘাইপথৰ কেইবাখনো দলং মেৰামতি কৰিবলগীয়া আছিলে, যদিও কোনো গুৰুত্ব নিদিলে বিভাগটোৱে ৷ যাৰ ফলত অতি বিপদজনক হৈ পৰিছে ডিব্ৰুগড়ৰ খোৱাঙৰ সমীপৰ গেমন ইণ্ডিয়া নামৰ নিৰ্মাণকাৰী সংস্থাটোৱে নিৰ্মাণ কৰা দলংখন ৷

উল্লেখ্য যে, বহুবছৰ পূৰ্বে নিৰ্মাণ কৰা দলংখনৰ প্ৰায় 50 মিটাৰ দৈৰ্ঘৰ ৰেলিং এটি পথ দুৰ্ঘটনাত ভাঙি গৈছিল যদিও আজিলৈকে পুনৰ নিৰ্মাণৰ কোনো গুৰুত্ব নিদিলে বিভাগীয় কৰ্তৃপক্ষই ৷ তাৰ পৰিৱৰ্তে বাঁ‌হৰ সৰু সৰু টুকুৰাৰে ৰেলিঙৰ দৰে সাজি দলঙখনত লগায়ে দায়িত্ব সামৰিছে ৷ সদা ব্যস্ত পথটোৰে দৈনিক হাজাৰ হাজাৰ সৰু-বৰ যান-বাহন অহা-যোৱা কৰা পথটোত সঘনাই পথ দুৰ্ঘটনা সংঘটিত হৈ আহিছে ৷ সংশ্লিষ্ট বিভাগে বিষয়টো গুৰুত্ব সহকাৰে নোলোৱাত প্ৰতিক্ৰিয়া প্ৰকাশ কৰিছে ভিন্নজনে ৷

ইফালে, ৰাষ্ট্ৰীয় ঘাইপথত চাৰিলেনযুক্ত পথ নিৰ্মাণৰ কাম তথা বুঢ়ীদিহিং নদীৰ ওপৰত নতুনকৈ দলং নিৰ্মাণৰ কামৰ প্ৰস্তুতি চলি থকাত এই দলং খনেৰে নিতৌ অহা-যোৱা কৰে শতাধিক গধুৰ যান-বাহনে । ইফালে অতি পুৰণি এই দলংখন মেৰামতি নকৰাত দ গাঁতৰ সৃষ্টি হোৱাত চিন্তিত হৈ পৰিছে সচেতন মহল ৷ লোকনিৰ্মাণৰ দৰে ৰাজ্যৰ বিয়াগোম বিভাগ এটা থকাৰ পাচতো ৰাষ্ট্ৰীয় পথৰ দলঙত বাঁহৰ ৰেলিং দিয়া বিষয়টোৱে উন্নয়নৰ প্ৰকৃত ছবিখন বাস্তৱিক কৰি তুলিছে ৷

লগতে পঢ়ক:ক'ভিডৰ ভয়াৱহ পৰিস্থিতি: নিৰ্মাণখণ্ডত দেখা দিছে অচলাৱস্থাই