টিংখাং,12 জানুৱাৰী: অসমত ছয় জনগোষ্ঠী ক্ৰমে মৰাণ, মটক, চুতীয়া, চাহ-জনগোষ্ঠী, আহোম, কোচ-ৰাজবংশীৰ জনজাতিকৰণ ইতিমধ্যে সম্পন্ন হৈছে ৷ সোমবাৰে শিলচৰত অংশগ্ৰহণ কৰা বিজেপিৰ সংকল্প ৰেলীত এই মন্তব্য কৰিছিল বিজেপিৰ ৰাষ্ট্ৰীয় অধ্যক্ষ জে.পি.নাড্ডাই ৷ বিজেপিৰ ৰাষ্ট্ৰীয় অধ্যক্ষগৰাকীৰ এই মন্তব্যক লৈ এতিয়া সৰৱ হৈ পৰিছে ছয় জনগোষ্ঠী ৷ জে.পি.নাড্ডাৰ এই মন্তব্যক লৈ মঙলবাৰে টিংখাঙৰ ৰাজগড়ত সদৌ টাই আহোম ছাত্ৰ সন্থাৰ ৰাজগড় আঞ্চলিক সমিতিয়ে প্ৰতিবাদ সাব্যস্ত কৰে ৷
ৰাজগড়ত সদৌ টাই আহোম ছাত্ৰ সন্থাৰ প্ৰতিবাদ কেৱল নিৰ্বাচনক কেন্দ্ৰ কৰিয়েই ৰাইজক মোহিত কৰাৰ উদ্দেশ্যে নাড্ডাই এই মন্তব্য কৰা বুলি ক্ষোভ উজাৰিছে টাই আহোম ছাত্ৰ সন্থাৰ ৰাজগড় আঞ্চলিক সমিতিয়ে ৷ ছয় জনগোষ্ঠীৰ সাংবিধানিক অধিকাৰক লৈ এনেধৰণৰ মন্তব্য কৰাৰ পৰা অনাগত দিনত বিৰত থাকিবলৈ বিজেপিৰ ৰাষ্ট্ৰীয় অধ্যক্ষগৰাকীৰ লগতে দলটোৰ অন্যান্য সদস্য সকলকো সকীয়াই দিয়ে টাই আহোম ছাত্ৰ সন্থাই ৷ মঙলবাৰে সংগঠনটোৰ সদস্যসকলে হাতে হাতে প্লে’কাৰ্ড লৈ চৰকাৰবিৰোধী বিভিন্ন শ্ল’গানেৰে পৰিৱেশ উত্তাল কৰি তোলে ৷
লগতে পঢ়ক-শিলচৰত বিজয় সংকল্প সভাত অংশগ্ৰহণ জে পি নাড্ডাৰ
