নাহৰকটীয়া, ২৮ আগষ্ট : নামৰূপ সাৰকাৰখানাৰ প্ৰৱেশদ্বাৰত অনুষ্ঠিত হয় "নামৰূপ সাৰকাৰখানা বচাওঁ আহক" শীৰ্ষক এক প্ৰতিবাদী কাৰ্যসূচী ৷ উক্ত প্ৰতিবাদী কাৰ্যসূচীত নামৰূপ সাৰকাৰখানাত চলি থকা বহিৰাগত লবীৰ দুৰ্নীতি, ভ্ৰষ্টাচাৰ আৰু নামৰূপ বিৰোধী ষড়যন্ত্ৰ বন্ধ কৰাৰ বাবে প্ৰবল প্ৰতিবাদ সাব্যস্ত হয় । উল্লেখ্য যে, ডিব্ৰুগড় জিলা ছাত্ৰ সন্থাই সাৰকাৰখানাৰ বন্ধৰ বিৰোধিতাৰে প্ৰায় দুমাহ ধাৰাবাহিক কাৰ্যসূচী গ্ৰহণ কৰি আহিছে আৰু ইয়াৰ মাজতে কেন্দ্ৰীয় সাৰমন্ত্ৰী মনসুখ মাণ্ডব্যক দিল্লীত সাক্ষাৎ কৰিছে ৷ কিন্তু দিল্লীৰ সাৰ মন্ত্ৰীৰ সৈতে হোৱা বৈঠকত সঠিক সমাধান লাভ নকৰি আছুৱে পুনৰ সাৰকাৰখানা ৰক্ষাৰ দাবীত ধাৰাবাহিক আন্দোলন কাৰ্যসূচী গ্ৰহণ কৰিছে ।
আজিৰ প্ৰতিবাদী কাৰ্যসূচীত অংশগ্ৰহণ কৰি জিলা ছাত্ৰ সন্থাৰ সভাপতি বুলবুল দত্তই কয় যে সদৌ অসম ছাত্ৰ সন্থা তথা সমগ্ৰ অসমৰ জাতীয় দল সংগঠনে সাৰকাৰখানাৰ প্ৰৱেশদ্বাৰৰ সন্মুখত দীৰ্ঘদিন ধৰি আন্দোলন কৰি আহিছে যদিও আজি পৰ্যন্ত কোনো এজন কেন্দ্ৰীয় তথা ৰাজ্য চৰকাৰৰ প্ৰতিনিধি নামৰূপত উপস্থিত হৈ ৰাইজক আশ্বস্ত কৰিব নোৱাৰা পৰিঘটনাই সাৰকাৰখানাটোক যে স্বাভাৱিক মৃত্যুৰ দিশলৈ আগবঢ়াই নিছে সেয়া স্পষ্ট হৈছে৷ দত্তই আৰু কয় যে উত্তৰ পূবৰ একমাত্ৰ ৰাসায়নিক সাৰৰ উদ্যোগ নামৰূপ সাৰকাৰখানাৰ এখন হাজাৰ কোটি টকাৰ বজাৰ আছে । সাৰকাৰখানাটো বন্ধ কৰি এই হাজাৰ কোটি টকাৰ বজাৰখন পুঁজিপতি গোষ্ঠীক গতাবৰ বাবে কেন্দ্ৰীয় চৰকাৰখনে ষড়যন্ত্ৰ কৰিছে ৷