ধন দাবী কৰি বিতৰ্কত জাতীয় সংগঠন

চোৰাং গৰু নিয়া ট্ৰাকৰ পৰা ধন দাবী কৰি বিতৰ্কত লাচিত সেনা

ডিব্ৰুগড়, 29 জুলাইঃ চোৰাং গৰু কঢ়িওৱা গাড়ীৰ পৰা ধন দাবী কৰি পুনৰ বিতৰ্কত সোমাল জাতীয় সংগঠন ৷ প্ৰাপ্ত তথ্য মতে, AS01JC 0265নম্বৰৰ ট্ৰাকখনে বগীবিল দলঙৰ উত্তৰ পাৰৰ পৰা 33 টা গৰু লৈ আহি থকা অৱস্থাত 52 নং ৰাষ্ট্ৰীয় ঘাইপথৰ ডিব্ৰুগড়ৰ বৰবৰুৱাত কেইবাজনো যুৱকে ট্ৰাকখন ৰখাই 1 লাখ টকাৰ দাবী কৰে ৷ ট্ৰাকৰ চালক আৰু অন্যান্য সকলে টকা দিবলৈ অমান্তি হোৱাত যুৱক কেইজনে তেওঁলোকক মাৰপিট কৰে ৷ পৰিস্থিতি উত্তপ্ত হোৱাত ঘটনাস্থলীত আৰক্ষী উপস্থিত হয় আৰু ক্ৰমে লুফু দত্ত, বিজয় কোঁৱৰ, অনুপ কোঁৱাৰ, বিজয় গগৈ,জয়ন্ত আৰান্ধৰা,জিন্টু গগৈ, গৌতম চেতিয়া আৰু ভৰত ফুকন নামৰ মুঠ আঠ জনক গ্ৰেপ্তাৰ কৰে ৷ উল্লেখযোগ্য যে, যুৱক কেইজনৰ দুজনে লাচিত সেনা নামৰ সংগঠনটোৰ সদস্য বুলি জানিবলৈ দিছে ৷ লক্ষণীয় যে, এই ঘটনাই পুনৰ উজনিত গৰুৰ চোৰাং বেহা অব্যাহত থকাৰ কথা পোহৰলৈ আনে ৷ আৰক্ষীয়ে বৰ্তমান এই বিষয়ত তদন্ত অব্যাহত ৰাখিছে । উল্লেখ্য যে, জাতীয় সংগঠনৰ এনে কাৰ্যই এতিয়া সচেতন ৰাইজক উদ্বিগ্ন কৰি তুলিছে ৷