ডিব্ৰুগড়, 21 ডিচেম্বৰ :ক্ৰিকেট খেলাৰ লগতে ক্ৰিকেট চাই ভালপোৱা সকলৰ বাবে সুখবৰ ৷ স্থাপন হ’বলৈ গৈ আছে এখন অত্যাধুনিক ক্ৰিকেট ষ্টেডিয়াম ৷ অসম ক্ৰিকেট সন্থা এইবাৰ নতুন ৰূপত আগবাঢ়িছে । মুখ্যমন্ত্ৰীৰ খুবেই ঘনিষ্ঠ বিধায়ক তৰংগ গগৈ অসম ক্ৰিকেট সন্থাৰ সভাপতি হিচাপে নিৰ্বাচিত হোৱা পাচতেই অসম ক্ৰিকেট সন্থাই ৰাজ্যখনত ক্ৰিকেটৰ এটা নতুন পৰিৱেশ সৃষ্টিৰ বাবে চেষ্টা কৰা পৰিলক্ষিত হৈছে । ২ কোটি টকা ব্যয়ৰে ২৫ বিঘা ভূমি সামৰি নিৰ্মাণ হ’ব অত্যাধুনিক ক্ৰিকেট ষ্টেডিয়াম ৷ বৃহস্পতিবাৰে আধাৰশিলা স্থাপন কৰিলে অসম ক্ৰিকেট সন্থাৰ সভাপতি তথা নাহৰকটীয়াৰ বিধায়ক তৰংগ গগৈয়ে ৷
অসম ক্ৰিকেট সন্থাৰ উদ্যোগত নাহৰকটীয়াৰ নগাঁও তিনিআলিত নিৰ্মাণ হ’ব অত্যাধুনিক ক্ৰিকেট ষ্টেডিয়াম । বৃহস্পতিবাৰে এই অত্যাধুনিক ক্ৰিকেট ষ্টেডিয়ামৰ আধাৰশিলা স্থাপন কৰা হয় । অসম ক্ৰিকেট সন্থাৰ সম্পাদক ত্ৰিদিৱ কোঁৱৰৰ উপস্থিতিত অসম ক্ৰিকেট সন্থাৰ সভাপতি তথা নাহৰকটীয়াৰ বিধায়ক তৰংগ গগৈয়ে এই ক্ৰিকেট ষ্টেডিয়াম তথা খেলপথাৰৰ আধাৰশিলা স্থাপন কৰে ।