ডিব্ৰুগড়, 14 মে':ডিব্ৰুগড়ৰ বাণীপুৰ ৰে'ল ষ্টেচন পালেহি দিল্লীৰ পৰা বহিঃৰাজ্যত আবদ্ধ লোকক কঢ়িয়াই অনা প্ৰথমখন ৰে'ল । বৃহস্পতিবাৰে পুৱা প্ৰায় 7:20 বজাত বাণীপুৰ ৰে'ল ষ্টেচনত উপস্থিত হোৱা ৰে'লখনক প্ৰথমে ছেনিটাইজ কৰা হয় । ইফালে ষ্টেচনৰ চৌহদত জিলা আৰু চক্ৰ অনুযায়ী নিৰ্মাণ কৰা কেন্দ্ৰ সমূহত যাত্ৰী সকলক স্ক্ৰীনিঙৰ ব্যৱস্থা কৰোতেই 4 গৰাকী লোকৰ দেহত জ্বৰৰ লক্ষণ ধৰা পৰে । জ্বৰৰ লক্ষণ ধৰা পৰা লোককেইজনক ততাতৈয়াকৈ জকাইৰ মডেল হাস্পতালত হাস্পতাল কোৱাৰেণ্টাইনৰ বাবে প্ৰেৰণ কৰা হয় । এই গৰাকী ব্যক্তিৰ ভিতৰত আছে দুটি শিশু । চাৰিওগৰাকী লোক একেটা পৰিয়ালৰে বুলি জানিব পৰা গৈছে । যুটীয়া স্বাস্থ্য সঞ্চালক ডাঃ নৱজ্যোতি গগৈয়ে জানিবলৈ দিয়া মতে, লোক কেইজনৰ তাৎক্ষণিকভাৱে COVID-19ৰ পৰীক্ষাৰ বাবে নমুনা সংগ্ৰহৰো ব্যৱস্থা কৰা হৈছে ।
ইফালে জিলা প্ৰশাসন আৰু প্ৰকাশিত তালিকা অনুসৰি ৰাজধানী এক্সপ্ৰেছখনত সৰ্বমুঠ 442 গৰাকী ব্যক্তি ডিব্ৰুগড়ৰ ষ্টেচনটোত নামিব লাগিছিল যদিও, জিলা প্ৰশাসনৰ শেহতীয়া তথ্য অনুসৰি ৰে'লখনৰ পৰা মুঠ 261 জন লোক বানীপুৰ ষ্টেচনত অৱতৰণ কৰে । ইয়াৰ ভিতৰত 74 গৰাকী ডিব্ৰুগড়ৰ লোক । প্ৰাৰম্ভিক পৰ্যায়ৰ স্ক্ৰীনিঙৰ পিচতে নিজ নিজ জিলাৰ প্ৰশাসনিক দলৰ তত্বাৱধানত লোক সকলক বিশেষ বাছেৰে, নিজ জিলাৰ ইনষ্টলেশ্যন কোৱাৰেণ্টাইন কেন্দ্ৰ সমূহলৈ প্ৰেৰণ কৰা হয় । ডিব্ৰুগড়ৰ চাৰিজনক হাস্পতাল কোৱাৰেণ্টাইন কৰাৰ বিপৰীতে, আন সকলক জিলাখনত স্থাপন কৰা সমূহীয়া কোৱাৰেণ্টাইন কেন্দ্ৰসমূহলৈ প্ৰেৰণ কৰে ।