ধুবুৰী, ১৫ ছেপ্টেম্বৰ : শুকুৰ আলী । নামেই যাৰ পৰিচয় । কেতিয়াবা যদি ৰাজনৈতিক মঞ্চত, কেতিয়াবা আকৌ চুটি চিনেমা বা ৰিল বনোৱাত ব্যস্ত থাকে শুকুৰ আলী । মুখ্যমন্ত্ৰী ড৹ হিমন্ত বিশ্ব শৰ্মাৰ ভাগিন বুলি পৰিচিত আৰু মুখ্যমন্ত্ৰীৰ সৈতে এটা সু-সম্পৰ্ক থকা বুলি দাবী কৰা শুকুৰ আলীক বিগত কিছুদিনৰ পৰা বিভিন্ন সময়ত চুটি চিনেমা বা গানৰ শ্বুটিঙত দেখিবলৈ পোৱা যায় ।
আজিও একাংশ ৰাইজে ভিৰ কৰিলে ধুবুৰীৰ আগমণি অঞ্চলৰ ১৭ নং ৰাষ্ট্ৰীয় ঘাইপথত । আৰক্ষীও আহিল । পিছে আজি কোনো শ্বুটিং থকা বুলি ভুল নুবুজিব । কাৰণ আজি একাংশ ৰাইজে আটক কৰি আৰক্ষীক গতালে এইজন শুকুৰ আলীক ।
এবিধ বিশেষ মাংসৰ অবৈধ ব্যৱসায়ত জড়িত থকাৰ অভিযোগত শুকুৰ আলীক আটক কৰি আৰক্ষীক গতালে ৰাইজে । গোলকগঞ্জৰ আগমণি আৰক্ষী থানাৰ বেলগুৰিৰ ১৭ নং ঘাইপথত শুকুৰবাৰে পুৱা ৫ বজাত আটক হয় শুকুৰ আলী । AS 01 D P 5469 নম্বৰৰ স্কুটিত ৩০ কিলোগ্ৰাম এই বিশেষ মাংস লৈ আগমণিৰ পৰা গৌৰীপুৰলৈ যাওঁতে ৰাইজে হাতে-লোটে আটক কৰে শুকুৰক । পিছত আগমণি আৰক্ষীয়ে শুকুৰ আলীক আটক কৰি থানালৈ লৈ যায় ।