চাপৰত বৃহৎ পৰিমাণৰ নিচাযুক্ত দ্ৰব্য সহ আটক তিনি যুৱক

চাপৰ আৰু শালকোছা আৰক্ষীৰ যৌথ অভিযানত জব্দ বহু নিচাযুক্ত দ্ৰব্য ৷ অভিযানত আৰক্ষীয়ে আটক কৰে 3 জন লোকক ৷

বিলাসীপাৰা, ১৫ অক্টোবৰ: সোমবাৰে নিশা পূব বিলাসীপাৰা চাপৰৰ ৩১নং ৰাষ্ট্ৰীয় ঘাইপথত চাপৰ আৰু শালকোছা আৰক্ষীয়ে যৌথ অভিযান চলাই। উক্ত অভিযানত আৰক্ষীয়ে এখন AS 01 DP 1036 নম্বৰৰ ইয়ন বাহনৰ পৰা প্ৰায় ১০০ বটল নিচাযুক্ত দ্ৰব্য সহ তিনিজনক আটক কৰিবলৈ সক্ষম হয় । আটকাধীন তিনিজন লোক ক্ৰমে নাচিৰ উদ্দিন, মিজানুৰ ৰহমান আৰু মাহমাদুল হুছেইন। আটাইকেইজন লোক বগৰীবাৰী অঞ্চলৰ বুলি জানিব পৰা গৈছে। আটকাধীন তিনি যুৱক সম্প্ৰতি চাপৰ আৰক্ষীৰ জিম্মাত ৷ অধিক তথ্যৰ বাবে জেৰা অব্যাহত ৰাখিছে আৰক্ষীয়ে।