কংগ্ৰেছৰ নেতৃত্বত ৰাজ্যত মহাজোঁটৰ চৰকাৰ গঠন হ'বঃ ৰকিবুল হুছেইন

গোলকগঞ্জত অনুষ্ঠিত কংগ্ৰেছৰ বিশাল গণ সমাৱেশত অংশ লোৱাৰ পূৰ্বে বাজেট সন্দৰ্ভত প্ৰতিক্ৰিয়া প্ৰকাশ কৰিলে প্ৰাক্তন মন্ত্ৰী তথা কংগ্ৰেছ নেতা ৰকিবুল হুছেইনে । তেওঁ কয় যে, বাজেটত উল্লেখ কৰা কথা আৰু বিজেপি চৰকাৰে কৰা কামৰ মাজত সাদৃশ্য নাথাকে । লগতে কংগ্ৰেছৰ নেতৃত্বত অসমত মহাজোঁটৰ চৰকাৰ গঠন হ'ব বুলিও মন্তব্য কৰে কংগ্ৰেছ নেতাগৰাকীয়ে ।

পূৱ বিলাসীপাৰা, 1 ফেব্ৰুৱাৰী: আগন্তুক বিধানসভা নিৰ্বাচনত বিজেপিক পৰাভূত কৰি শাসনৰ বাঘজৰী নিজৰ হাতলৈ আনিবলৈ নিৰ্বাচনী প্ৰস্তুতি তীব্ৰতৰ কৰি তুলিছে কংগ্ৰেছে । সোমবাৰে গোলকগঞ্জত কংগ্ৰেছৰ বিশাল গণ সমাৱেশ অনুষ্ঠিত হয় । ধুবুৰী জিলা কংগ্ৰেছ কমিটীৰ উদ্যোগত এই গণ সমাৱেশত অংশগ্ৰহণ কৰে প্ৰাক্তন মন্ত্ৰী ৰকিবুল হুছেইনে । সভাত অংশগ্ৰহণৰ পূৰ্বে কংগ্ৰেছ নেতাগৰাকী পূৱ বিলাসীপাৰাৰ বহলপুৰত উপস্থিত হয় আৰু দলৰ কৰ্মকৰ্তাই তেওঁক উষ্ম আদৰণি জনায় ।

আজি সদনত দাখিল কৰা বাজেট সন্দৰ্ভত প্ৰতিক্ৰিয়া প্ৰকাশ কৰে ৰকিবুল হুইছেনে । তেওঁ কয় যে, 'বাজেট দাখিল কৰাৰ আগতে সকলোৱে আগ্ৰহেৰে অপেক্ষা কৰি থাকে । চৰকাৰে বাজেটৰ দাখিল কৰে ঠিকেই, কিন্তু বাজেটত উল্লেখ কৰা কথা আৰু বিজেপি চৰকাৰে কৰা কামৰ মাজত কোনো সাদৃশ্য নাথাকে । ফলত সাধাৰণ ৰাইজে হাৰাশাস্তি ভূগিবলগীয়া হয়' ।

বিধানসভা নিৰ্বাচন প্ৰসংগত তেওঁ কয় যে, 'কংগ্ৰেছৰ নেতৃত্বত অসমত মহাজোঁটৰ চৰকাৰ গঠন হোৱাটো দিনৰ পোহৰৰ দৰে স্পষ্ট' । নিৰ্বাচনৰ প্ৰাক ক্ষণত কেইবাজনো জ্যেষ্ঠ নেতাই দল ত্যাগ কৰি যোৱাৰ পিছতো দলৰ সাংগঠনিক ভেঁটি শক্তিশালী কৰি পুনৰ শাসনভাৰ নিজৰ হাতলৈ নিবলৈ প্ৰস্তুতি চলাইছে কংগ্ৰেছে ।

লগতে পঢ়ক:তেজপুৰত পানী যোগান আঁচনিৰ কৰ্মচাৰীৰ ধৰ্মঘট