গুৱাহাটী, 27 জানুৱাৰীঃ অৱশেষত স্বাক্ষৰিত হ’ল তৃতীয়খন বড়ো শান্তি চুক্তি ৷ সোমবাৰে অৰ্থাৎ 27 জানুৱাৰীত নতুন দিল্লীত কেন্দ্ৰীয় চৰকাৰ, অসম চৰকাৰ তথা বিটিচি প্ৰশাসনৰ উপস্থিতিত সশস্ত্ৰ বিদ্ৰোহী সংগঠন নেশ্যনেল ডেম'ক্ৰেটিক ফ্ৰন্ট অৱ বড়োলেণ্ড চমুকৈ এনডিএফবিৰ সৈতে এক চুক্তি স্বাক্ষৰিত হয় ৷ এই ত্ৰি-পাক্ষিক চুক্তিৰ স্বাক্ষৰকাৰী হিচাপে থাকে অসমৰ মুখ্যমন্ত্ৰী সৰ্বানন্দ সোণোৱাল, এনডিএফবিৰ চাৰিওটা গোটৰ শীৰ্ষ নেতৃত্ব, নিখিল বড়ো ছাত্ৰ সন্থাৰ শীৰ্ষ নেতৃত্ব আৰু কেন্দ্ৰীয় চৰকাৰ ৷ এই চুক্তি স্বাক্ষৰিত হোৱাৰ পিচত বিভিন্ন মহলৰ বিভিন্ন প্ৰতিক্ৰিয়া প্ৰকাশ ৷ বড়ো চুক্তিক জনবিৰোধী আৰু অসাংবিধানিক বুলি আখ্যা বড়োভূমিৰ 6 টাকৈ সংগঠনৰ ৷ এই চুক্তিখনে পৰৱৰ্তী সময়ত পৃথক ৰাজ্য গঠনৰ পথ মুকলি কৰিছে আৰু বড়োভূমিৰ অবড়ো লোকসকলে এই চুক্তি কেতিয়াও মানি নলয় বুলি মন্তব্য প্ৰদান কৰে ৷ লগতে এই চুক্তিখনৰ স্বাক্ষৰ হোৱাৰ পূৰ্বে বড়োভূমিত বসবাস কৰা অবড়োসকলৰ সৈতে কোনোধৰণৰ আলোচনা হোৱা নাই বুলিও উল্লেখ কৰে ৷ এই চুক্তি স্বাক্ষৰিত হোৱাৰ পিচত বড়োভূমিৰ 6টা অবড়ো সংগঠনে সোমবাৰে এক সংবাদমেল সম্বোধন কৰি বড়োভূমিৰ 72 শতাংশ লোকক বাদ দি এই চুক্তি স্বাক্ষৰিত হোৱা বুলিও উল্লেখ কৰে ৷
ইয়াৰ পূৰ্বে 2003 চনত স্বাক্ষৰিত হোৱা চুক্তিৰ সময়তো বড়োভূমিত বসবাস কৰা অবড়োসকলৰ সকলো অধিকাৰ পূৰ্বৰ দৰেই থাকিব বুলি কোৱা হৈছিল যদিও পৰৱৰ্তী সময়ত অবড়োসকলৰ অধিকাৰ খৰ্ব হৈছে বুলিও উল্লেখ কৰি এই চুক্তিখনে অবড়োসকলৰ সকলো অধিকাৰ আৰু অধিক খৰ্ব কৰিব বুলিও মন্তব্য কৰে সংগঠনৰ নেতৃবৰ্গই ৷ এই চুক্তিখনৰ জৰিয়তে বড়োভূমিত বসবাস কৰা অবড়োসকলৰ ভূমিৰ অধিকাৰো কাঢ়ি নিয়া হ'ব বুলি সন্দেহ প্ৰকাশ কৰিছে অবড়োসকলে । সংগঠনকেইটাৰ নেতৃবৰ্গই লগতে কয় যে যদি এইখন শান্তি চুক্তি তেন্তে এই চুক্তিত সকলোৰে মতামতৰ প্ৰয়োজন আছে ৷ চৰকাৰে বড়োভূমিৰ সকলো অবড়ো সংগঠনৰ মতামত গ্ৰহণ কৰি এই চুক্তিখনে কৰিলে আমি এই চুক্তিক আদৰণি জনোৱোৰ থল আছিল ৷ চৰকাৰে পুনৰ বিবেচনা কৰি সকলোৰে মতামত গ্ৰহণ কৰি এই চুক্তি নতুনকৈ স্বাক্ষৰ কৰাৰ বাবে আহ্বান সংগঠনকেইটাৰ । উল্লেখ্য যে অবড়োসকলে একপক্ষীয় চুক্তিৰ সদায় বিৰোধিতা কৰি যাব আৰু ইতিমধ্যে এই চুক্তিৰ বিৰোধিতা কৰি বড়োভূমিত কেইবাটাও দল-সংগঠনে আজিৰ পৰা অনিৰ্দিষ্ট কাললৈ বন্ধৰ ঘোষণা কৰিছে ৷
গুৱাহাটীঃ এই নতুন বড়ো চুক্তি স্বাক্ষৰ হোৱাৰ পিচত প্ৰতিক্ৰিয়া প্ৰকাশ অসম জাতীয়তাবাদী যুৱ ছাত্ৰ পৰিষদৰ সম্পাদক পলাশ চাংমাইৰ ৷ এই চুক্তিয়ে বড়োভূমিত দীৰ্ঘদিন ধৰি চলি থকা সশস্ত্ৰ আন্দোলনক মাত্ৰা প্ৰদান কৰি ইয়াৰ অন্ত পেলাবলৈ সক্ষম হোৱাটোক আদৰণি জনায় সম্পাদকগৰাকীয়ে ৷ কিন্তু এটা জনগোষ্ঠীৰ নামত বড়োভূমিত বাস কৰা অন্যান্য খিলঞ্জীয়া জনগোষ্ঠীসমূহক উপহাস কৰাটো কোনো কাৰণতে গ্ৰহণযোগ্য নহয় বুলিও মন্তব্য পলাশ চাংমাইৰ ৷ সকলো জনগোষ্ঠীৰ উন্নয়ন হ'ব পৰাকৈ চৰকাৰক ব্যৱস্থা কৰিবলৈ দাবী জনাই অসম জাতীয়তাবাদী যুৱ ছাত্ৰ পৰিষদে ৷ অবড়োসকলে দীৰ্ঘদিন ধৰি ভূগি অহা বিভিন্ন সমস্যাৰ বিষয়ে উল্লেখ কৰি সৰৱ হৈ পৰে অসম জাতীয়তাবাদী যুৱ ছাত্ৰ পৰিষদৰ নেতাগৰাকী । ইফালে চৰকাৰে গণতান্ত্ৰিক আন্দোলনকাৰীসকলক গুৰুত্ব নিদি সশস্ত্ৰ পন্থাৰে আন্দোলন চলোৱাসকলৰ দাবী মানি লোৱা কাৰ্যত ক্ষোভ ব্যক্ত কৰে পলাশ চাংমাই ।