ধুবুৰী, 3 আগষ্ট:ধুবুৰীত পুনৰ তীব্ৰতৰ হৈ উঠিব উইমক’ ফেক্টৰী বচাও আন্দোলন ৷ ধুবুৰীৰ উইমক’ ফেক্টৰীৰ ভূমি বিক্ৰীক কেন্দ্ৰ কৰি তীব্ৰ প্ৰতিক্ৰিয়াৰ সৃষ্টি হৈছে জিলাখনত ৷ উইমকো বচাও কমিটীৰ উপৰিও বিভিন্ন দল সংগঠনে প্ৰতিষ্ঠানটোৰ ভূমি অন্য এটা প্ৰতিষ্ঠানক বিক্ৰী কৰি দিয়াৰ অভিযোগত পুনৰ আন্দোলন গঢ়ি তোলাৰ হুংকাৰ প্ৰদান কৰিছে ৷
আনকি চৰকাৰী লিজত দিয়া ভূমি বিক্ৰী কৰাৰ উপৰিও স্থানীয় পূৰ্ব পুৰুষৰ নামত থকা পট্টা ভূমিও অতি গোপনভাৱে বিক্ৰী কৰাৰ অভিযোগ উত্থাপন হৈছে ৷ ধুবুৰীৰ স্থানীয় পূৰ্ব পুৰুষে দান কৰা ভূমি আৰু কিছু চৰকাৰে লিজত দিয়া ভূমিত গঢ়ি তোলা জুইশলাৰ কাৰখানাটো বৰ্তমান ITC কোম্পানীয়ে গোপনভাৱে বিক্ৰী কৰিছে কামৰূপ আইচ আৰু কোল্ড ষ্টোৰ কোম্পানীৰ হাতত ৷
1925 চনত স্থাপিত হোৱা আৰু দেশৰ পাঁচটা লাভজনক মেচ ফেক্টৰীৰ ভিতৰত অন্যতম আছিল উইমক’ নামৰ এই জুইশলাৰ উদ্যোগটো ৷ ধুবুৰী চহৰৰ উপকণ্ঠ অঞ্চলৰ 132 বিঘা মাটিত স্থাপন হৈছিল বৃহৎ উদ্যোগটো ৷ 1935 চনত অসমৰ প্ৰথমটো শ্ৰমিক দিৱস উদযাপন কৰা হৈছিল এইটো উদ্যোগৰ পৰাই ৷ যদিও 1997 চনত বন্ধ হৈ পৰা কোম্পানীটো 2001 চনত বিক্ৰী কৰা হয় আই টি চি নামৰ এটা কোম্পানীৰ হাতত ৷