পূৱ বিলাসীপাৰা, 31 আগষ্ট : ভাৰতৰ প্ৰতিখন ৰাজ্যৰ প্ৰতিটো পৰিয়ালকে বিশুদ্ধ খোৱা পানী যোগান ধৰাৰ বাবে কেন্দ্ৰীয় চৰকাৰে আৰম্ভ কৰিছে "জল জীৱন আঁচনি" শীৰ্ষক এক খোৱাপানী যোগান আঁচনি ৷ দেশৰ প্ৰধানমন্ত্ৰী নৰেন্দ্ৰ মোডীৰ বিশেষ চিন্তা তথা আগ্ৰহৰ প্ৰতিফলন এই আঁচনিখন ৷ কিন্তু অসমত এই আঁচনিৰ আৰম্ভ হোৱাৰ লগে লগে একাংশ ঠিকাদাৰে নিম্ন মানদণ্ডৰ কাম কৰি আঁচনিৰ ধন হৰলুকিৰ কৰাৰ অভিসন্ধি ৰচিছে ৷ ৰাজ্যৰ বিভিন্ন প্ৰান্তত উত্থাপিত হৈছে এই অভিযোগ ৷
শেহতীয়াকৈ ধুবুৰী জিলাৰ বহলপুৰৰ বৰপাৰা প্ৰথম খণ্ড গাঁৱতো এই আঁচনিৰ কামত ঠিকাদাৰে বিসংগতি কৰাৰ অভিযোগ উত্থাপিত হৈছে ৷ ৰাইজৰ অভিযোগ, বহলপুৰৰ বৰপাৰা প্ৰথম খণ্ড গাঁৱত পানী যোগানৰ বাবে সংযোগ কৰা মুখ্য পাইপডাল পোতাৰ ক্ষেত্ৰত ঠিকাদাৰে চৰকাৰী নিৰ্দেশনাক অৱমাননা কৰিছে ৷
চৰকাৰী নিৰ্দেশ মৰ্মে পাইপডাল 3 ফুট দ'কৈ গাত খান্দি পুতিব লাগে, কিন্তু ঠিকাদাৰ গৰাকীয়ে চৰকাৰী নিৰ্দেশনা নামানি কেৱল 1 ফুটৰ পৰা 1.5 ফুট মান দ' গাঁত খান্দি মুখ্য পাইপ ডাল পুতি থৈ যায় ৷ আনকি কোনো কোনো ঠাইত গাঁত নাখান্দি মাটিৰ ওপৰেদিয়েই মুখ্য পাইপ ডাল সংযোগ কৰি গৈছে বুলি অভিযোগ তুলিছে ৰাইজে ৷
ইয়াৰ ফলত যিকোনো মূহুৰ্ততে মুখ্য পাইপ ডাল ফাটি যাব পাৰে বুলি স্থানীয় লোকে সন্দেহ প্ৰকাশ কৰিছে ৷ উল্লেখ্য যে, জন স্বাস্থ্য আৰু কাৰিকৰী বিভাগৰ চৰম হেমাহি আৰু বিষয়া কৰ্মচাৰীৰ নিৰ্লিপ্ততাৰ সুযোগ গ্ৰহণ কৰি এই আঁচনি খনক একাংশ ঠিকাদাৰে ধন ঘটা আঁচনিলৈ ৰূপান্তৰিত কৰাৰ অভিযোগ উঠিছে ৷