"নিৰ্বাচনত আমি জিকিম, আছু হাৰিব"-পীযুষ হাজৰিকা

ধুবুৰী জিলাত অনুষ্ঠিত এক অনুষ্ঠানত অংশ লৈ সদৌ অসম ছাত্ৰ সন্থাক তীব্ৰ আক্ৰমণ কৰিলে মন্ত্ৰী পীযুষ হাজৰিকাই ৷ আছুৱে অসমক বহুদূৰ পিছুৱাই আনিলে বুলিও অভিযোগ উত্থাপন কৰে মন্ত্ৰী গৰাকীয়ে ৷

ধুবুৰী , 19 জানুৱাৰীঃ"আছু এটা মিথ্যাচাৰীৰ দল । আছুৱে যদি নতুন দল খোলে, তেওঁলোকক শুভেচ্ছা দিছো । ৰাজনৈতিক পথাৰখনত তেওঁলোকৰ লগত আমাৰ প্ৰতিদ্বন্দিতা হ'ব । আমি নিৰ্বাচনত নিশ্চিতভাৱে জিকিম , তেঁওলোক হাৰিব ৷" ধুবুৰীৰ চাপৰৰ এক অনুষ্ঠানত উপস্থিত থাকি এই বিতৰ্কিত মন্তব্য কৰিলে নগৰ উন্নয়ন মন্ত্ৰী পীযুষ হাজৰিকাই ৷ চাপৰ ৰাজহ চক্ৰ বিষয়াৰ কাৰ্যালয়ৰ সন্মুখত অসমৰ প্ৰাক্তন মুখ্যমন্ত্ৰী প্ৰয়াত শৰৎ চন্দ্ৰ সিংহৰ এটা প্ৰতিমূৰ্তি উন্মোচন অনুষ্ঠানত উপস্থিত থাকি এই মন্তব্য প্ৰদান কৰে মন্ত্ৰী হাজৰিকাই ৷

সদৌ অসম ছাত্ৰ সন্থাক তীব্ৰ আক্ৰমণ কৰি মন্ত্ৰী গৰাকীয়ে লগতে কয় যে , মিছা কথা কৈ কৈ ইতিমধ্যে আছুৱে অসমক বহু পিছুৱাই আনিলে ৷ এতিয়াও ভুৱা কথা আৰু তথ্যৰে আভুৱা ভাৰি অসমৰ ৰাইজক বিপথে পৰিচালিত কৰিব বিচাৰিছে আছুৱে ৷ অনুষ্ঠানটোত মন্ত্ৰী গৰাকীৰ লগতে উপস্থিত থাকে পূৱ বিলাসীপাৰাৰ বিধায়ক অশোক কুমাৰ সিংহী । আনহাতে , চাপৰ নগৰৰ 7 নং বাৰ্ডত এটা নলাৰ আধাৰশিলা স্থাপন কৰে মন্ত্ৰী গৰাকীয়ে ৷

লগতে পঢ়কঃ অন্ধ্ৰপ্ৰদেশৰ প্লাষ্টিকমুক্ত আধ্যাত্মিক চহৰ তিৰুপতি