গৌৰীপুৰ গুদামঘৰৰ পৰা উদ্ধাৰ বৃহৎ পৰিমাণৰ মচুৰ দাইল

শুকুৰবাৰে নিশাৰ ভাগত সংগোপনে আনি এক ট্ৰাক দাইল গুদাম ঘৰটোত থৈ যায় ৷ গুদাম ঘৰত থকা ধানৰ বস্তাৰ তলতে দাইল খিনি সোমাৱাই থৈ দিয়ে যদিও ধানৰ গৰাকীক এই বিষয়ে অৱগত কৰা হোৱা নাছিল বুলি অভিযোগ কৰে ধানৰ গৰাকীয়ে ৷

ধুবুৰী, 20 জুলাইঃ ধুবুৰীৰ গৌৰীপুৰ মাৰ্কেটিং কম্প্লেক্সৰ গুদাম ঘৰত বৃহৎ পৰিমাণৰ মচুৰ দাইল উদ্ধাৰ ৷ বানৰ কবলত পৰি জিলাখনৰ লাখ লাখ লোকে খাদ্যৰ অভাৱত হাহাকাৰ কৰি থকা সময়ত দাইল উদ্ধাৰ হোৱা ঘটনাই চাঞ্চল্য সৃষ্টি কৰিছে অঞ্চলজুৰি ৷ উল্লেখ্য যে, শনিবাৰে গৌৰীপুৰস্থিত ধুবুৰী বজাৰ নিয়ন্ত্ৰিত বজাৰ সমিতিৰ গুদাম ঘৰত স্থানীয় ৰাইজে লুকাই ৰখা অৱস্থাত উদ্ধাৰ কৰে বৃহৎ পৰিমাণৰ মচুৰ দাইলখিনি ৷ তাৰ পাচতে ঘটনা সন্দৰ্ভত আৰক্ষীৰ লগতে সংবাদ মাধ্যমক খবৰ দিয়ে ৷ অভিযোগ অনুসৰি, শুকুৰবাৰে নিশাৰ ভাগত সংগোপনে আনি এক ট্ৰাক দাইল গুদাম ঘৰটোত থৈ যায় ৷ গুদাম ঘৰত থকা ধানৰ বস্তাৰ তলতে দাইল খিনি সোমাই থৈ দিয়ে যদিও ধানৰ গৰাকীক এই বিষয়ে অৱগত কৰা হোৱা নাছিল বুলি অভিযোগ কৰে ধানৰ গৰাকীয়ে ৷

আনহাতে, ধুবুৰী জিলা নিয়ন্ত্ৰিত বজাৰ সমিতিৰ সভাপতি আব্দুছ ছবুৰৰ পুত্ৰই গুদাম ঘৰটো দাইলখিনি লুকুৱাই থয় বুলি অভিযোগ উত্থাপন কৰে স্থানীয় লোকে ৷ বান সাহায্যৰ বাবে দিয়া দাইল সমূহ এইদৰে গোপন স্থানত জমা কৰি ৰাখি চোৰাং বজাৰত বিক্ৰী কৰিব বুলি আশংকা প্ৰকাশ কৰে ৰাইজে ।

উল্লেখযোগ্য যে, ঘটনা সন্দৰ্ভত ধুবুৰী জিলা প্ৰশাসনে ইতিমধ্যে অনুসন্ধান আৰম্ভ কৰিছে যদিও পৰৱৰ্তী সময়ত ঘটনা কোন দিশে গতি কৰে সেয়াহে লক্ষণীয় হ’ব ৷