বিলাসীপাৰাত গৰা-খহনীয়া প্ৰতিৰোধৰ নামত কেলেংকাৰীৰ ৰাজহুৱা অভিযোগ

খহনীয়া প্ৰতিৰোধী ব্যৱস্থাৰ নামত ছুৱাপাতা গাঁও পঞ্চায়তৰ সভাপতি হুৰমুজ আলী, সচিব চাহজাহান আলীয়ে বিভাগীয় কনিষ্ঠ অভিযন্তা ছাইফুল ইছলামৰ সহযোগত লুন্ঠন চলোৱাৰ অভিযোগ তুলিছে স্থানীয় ৰাইজে

বিলাসীপাৰা, 5 মে': কাজাইকাটা ছুৱাপাতা গাঁও পঞ্চায়তৰ অধীনস্থ ছুৱাপাতা ৩য় খণ্ড গাঁৱত কেলেংকাৰীৰ অভিযোগ ৷ বৃহত্তৰ অঞ্চলটোক গৌৰাং নৈৰ খহনীয়াৰ পৰা ৰক্ষণা-বেক্ষণ দিবলৈ চৰকাৰে ২০১৮-১৯ বৰ্ষৰ এম জি এনৰেগা আঁচনিত মঞ্জুৰি দিছিল ১৬ লাখ টকা ৷ সেইমতে খহনীয়া প্ৰতিৰোধী ব্যৱস্থাৰ নামত গাঁও পঞ্চায়তৰ সভাপতি হুৰমুজ আলী, সচিব চাহজাহান আলীয়ে বিভাগীয় কনিষ্ঠ অভিযন্তা ছাইফুল ইছলামৰ সহযোগত লুন্ঠন চলোৱাৰ অভিযোগ তুলিছে স্থানীয় ৰাইজে ৷

সম্প্ৰতি নৈৰ খহনীয়াক লৈ আতংকিত হৈ পৰিছে জনবসতিপূৰ্ণ দুখনকৈ গাঁও | উল্লেখ্য যে মুখ্যমন্ত্ৰী সৰ্বানন্দ সোণোৱালে এক নিৰ্দেশনা যোগে ৰাজ্যৰ ভিন্ন প্ৰান্তৰ গৰাখহনীয়া , ভগ্ন মথাউৰি নিৰ্মাণ ব্যৱস্থাৰ কথা উল্লেখ কৰিছে ৷ তেনে সময়তো এই তিনিগৰাকী পঞ্চায়ত সভাপতি, সচিব, অভিযন্তাই মুখ্যমন্ত্ৰীৰ নিৰ্দেশনাৰ অৱমাননা কৰি চৰকাৰী ধনৰ শৰাধ চলোৱাৰ অভিযোগ তুলিছে অঞ্চলবাসীয়ে ৷ এই সকল প্ৰতিনিধি তথা বিষয়াৰ কাৰ্য কলাপৰ ফলতেই গৌৰাং নৈৰ খহনীয়াত দুখনকৈ গাঁও জাহ যোৱা শংকাই দিছে বুলিও উল্লেখ কৰে একাংশ স্থানীয় ৰাইজে ৷