স্মৃতি দিৱসৰ দিনটোতে ধুবুৰীত অৱহেলিত হৈ ৰ'ল শ্বহীদ কুশল কোঁৱৰ

সোমবাৰে 77 তম মৃত্যু বৰ্ষিকীৰ দিনটোতে ধুবুৰীত অৱহেলিত হৈ ৰ'ল শ্বহীদ কুশল কোঁৱৰ ৷ ধুবুৰীৰ ব্ৰহ্মপুত্ৰৰ পাৰৰ ধুবুনী ঘাটৰ উদ্যানত অৱস্থিত শ্বহীদ গৰাকীৰ প্ৰতিমূৰ্তিত আগত নজ্বলিল এগছিও বন্তি ৷

ধুবুৰী, 15 জুনঃৰাজ্যজুৰি 15 জুনৰ দিনটোত পালন কৰি অহা হৈছে শ্বহীদ কুশল কোঁৱৰ স্মৃতি দিৱস হিচাপে ৷ ১৯৪৩ চনৰ আজিৰ দিনটোতে দেশৰ হকে ফাঁচী কাঠত উঠিছিল শ্বহীদ কুশল কোঁৱৰ ৷ কিন্তু আজিৰ এই দিনটোতে ধুবুৰীত অপমানিত হ'ল দেশৰ হকে প্ৰাণ আহুতি দিয়া শ্বহীদ গৰাকী ৷ ধুবুৰীৰ ব্ৰহ্মপুত্ৰৰ পাৰত অৱস্থিত নেতাই ধুবুনী ঘাটৰ উদ্যানত ২০০৫ চনতে ধুবুৰী জিলা আৰক্ষী প্ৰশাসনৰ পুঁজিৰে স্থাপন কৰা হৈছিল শ্বহীদ কুশল কোঁৱৰৰ প্ৰতিমূৰ্তি ৷ তদানীন্তন কৃষি আৰু চৰ উন্নয়ন মন্ত্ৰী ৱাজেদ আলী চৌধুৰীয়ে শুভ উদ্বোধন কৰা কুশল কোঁৱৰৰ প্ৰতিমূৰ্তি আজিৰ এই বিশেষ দিনটোতে পৰি ৰৈছে উকা হৈ ৷

কুশল কোঁৱৰৰ প্ৰতিমূৰ্তি আজিৰ এই বিশেষ দিনটোত পৰি ৰৈছে উকা হৈ

শ্বহীদ গৰাকীৰ ৭৭ তম মৃত্যু দিৱসত তেওঁৰ প্ৰতিমূৰ্তিৰ সন্মুখত নজ্বলিল এগছিও বন্তি ৷ আনকি প্ৰতিমূৰ্তিত এজাল মালা আঁৰিবলৈয়ো আহৰি নাপালে জিলা প্ৰশাসনে ৷ যাক লৈ এতিয়া ক্ষোভ প্ৰকাশ কৰিছে একাংশ স্থানীয় ৰাইজে ৷ স্থানীয় লোকৰ অভিযোগ প্ৰতিদিনেই জিলা প্ৰশাসনৰ লোক সেই বাটেৰেই অহা যোৱা কৰা সত্বেও তেওঁলোকে দৃষ্টি গোচৰ নহ'ল শ্বহীদ গৰাকীৰ প্ৰতিমূৰ্তি ৷ আনকি সাহিত্য সভাকে ধৰি আন আন অনুষ্ঠানেও শ্বহীদ কুশল কোঁৱৰক পাহৰিলে বুলিও উল্লেখ কৰে স্থানীয় লোকে ৷

লগতে পঢ়কঃএকেলগে হাত ভৰি মুখেৰে ছবি আঁকিব পৰা যুৱকজন