ধুবুৰী, ১২ মে': ধুবুৰীত ক্ৰমান্বয়ে বৃদ্ধি হৈ অহা মহামাৰীৰ সংক্ৰমণৰ পৰিপ্ৰেক্ষিতত জিলাখনৰ সকলো সাপ্তাহিক আৰু দ্বি-সাপ্তাহিক বজাৰ বন্ধৰ ৰখাৰ নিৰ্দেশ জাৰি কৰিছে জিলা প্ৰশাসনে । বুধবাৰে পুৱা ৫ বজাৰ পৰা জিলা উপায়ুক্তৰ এই নিৰ্দেশ কাৰ্যকৰী হৈছে ৷
বজাৰবোৰত ব্যাপক জন সমাগম হোৱাৰ লগতে বজাৰলৈ অহা অধিকাংশ লোকেই ক'ভিড বিধি উলংঘা কৰে । সামাজিক দূৰত্ব মানি চলা দূৰৰে কথা মাস্কো সঠিকভাৱে নিপিন্ধে । ফলত মহামাৰীৰ সংক্ৰমণস্থলীলৈ পৰিণত হয় এই বজাৰবোৰ ।
সেয়ে, সংক্ৰমণ ৰোধ কৰাৰ উদ্দেশ্যেৰে সাপ্তাহিক আৰু দ্বি-সাপ্তাহিক বজাৰ বন্ধৰ ৰখাৰ নিৰ্দেশ দিছে ধুবুৰী জিলা প্ৰশাসনে । পৰৱৰ্তী নিৰ্দেশ নিদিয়া পৰ্যন্ত এই নিৰ্দেশেই মানি চলিব লাগিব বুলিও উল্লেখ কৰা হৈছে প্ৰশাসনৰ নিৰ্দেশনাত ৷
আনহাতে, এই নিৰ্দেশ উলংঘা কৰা লোকৰ বিৰুদ্ধে বিহিত ব্যৱস্থা গ্ৰহণ কৰা হ'ব বুলিও সকীয়নি দিছে জিলা প্ৰশাসনে । উল্লেখ্য যে, ধুবুৰী জিলাত এতিয়ালৈকে ১৩২৭ গৰাকী লোক মহমাৰীত আক্ৰান্ত হৈছে । আনহাতে, কৰ'ণাত আক্ৰান্ত হৈ ১০ জন লোকৰ মৃত্যু হৈছে । জিলাখনত মাত্ৰ এটা দিনত আক্ৰান্ত হৈছে ১৪৪ জন লোক ।
