ধুবুৰী, 7 নৱেম্বৰঃ ধুবুৰীৰ গোলকগঞ্জত ভূমি বিবাদক লৈ দুই পক্ষৰ সংঘৰ্ষ । মোমাই আৰু ভাগিন পক্ষৰ মাজত সংঘটিত হোৱা ভূমি বিবাদীয় সংঘৰ্ষত আহত হয় ভাগিন পক্ষৰ কেইবাজনো । খবৰ অনুসৰি, চাৰিআলিৰ আধাবিঘা মাটিক কেন্দ্ৰ কৰি দীর্ঘদিনৰে পৰা মোমাই ভাগিন পক্ষৰ মাজত সংঘাত চলি আহিছে ।
লগতে পঢ়কঃ ওড়িশাৰ দুৰ্ভগীয়া এহাল পিতৃ মাতৃয়ে মৃত পুত্ৰক জীয়াই ৰাখিলে কিদৰে ?
সংঘাতৰ পৰিপ্ৰেক্ষিততে বৃহস্পতিবাৰে মোমাই পক্ষৰ নুৰ হুছেইন আলী প্ৰধানী, ছয়ফৰ আলী প্ৰধানী, আনোৱাৰ হুছেইন, আলী হুছেইন আৰু কাশেম আলীকে ধৰি কেইবাজনো ব্যক্তি ভূমিত হাল বোৱাবলৈ উপস্থিত হয় । তেনে সময়তে ভাগিন পক্ষৰ ফালৰ পৰা হাল বোৱা কাৰ্যত বাধা প্ৰদান কৰাক লৈ প্ৰথমতে দুই পক্ষৰ মাজত তৰ্ক যুদ্ধ আৰম্ভ হয় । পাচত ক্ৰমাৎ পৰিস্থিতি উত্তপ্ত হৈ পৰাৰ সময়তে লাঠী আৰু চোকা অস্ত্ৰ আদিৰে আক্ৰমণ আৰম্ভ হয় মোমাইৰ পক্ষৰ । ফলত ভাগিন পক্ষৰ সাতজনকৈ লোক আহত হয় । ইয়াৰে ভিতৰত গোলাম ৰাব্বাণী, গোলাম উচমানি, গোলাম জেলানি, গোলাম ৰহমান, আব্দুল বাৰেক, মইনা বিবি আৰু গোলাম মৌলাক ধুবুৰী অসামৰিক চিকিৎসালয়ত ভৰ্তি কৰোৱা হয় । আনহাতে মোমাইৰ পক্ষৰ এজন আহত হোৱা বুলি জানিব পৰা গৈছে ।
উল্লেখযোগ্য যে, এই ঘটনাৰ পিছতেই স্থানীয় গোলকগঞ্জ আৰক্ষী থানাত এজাহাৰ দাখিল কৰা হৈছে যদিও আৰক্ষী এতিয়ালৈকে কোনো লোকক আটক কৰিবলৈ সক্ষম হোৱা নাই ।
