কাৰ গাফিলতিৰ বাবে পলাল আচামী !

বিলাসীপাৰা মহকুমা ন্যায়িক দণ্ডাধীশৰ আদালতত অঘটন । আৰক্ষীৰ জিম্মাৰ পৰাই পলাল আচামী

বিলাসীপাৰা, 28 জুনঃ বিলাসীপাৰা মহকুমা ন্যায়িক দণ্ডাধীশৰ আদালতৰ পৰা শুকুৰবাৰে বিয়লি আদালতৰ আৰক্ষীৰ জিম্মাৰ পৰা পলাই গ'ল আচামী ৷ পলায়ন কৰা আচামীজন ফিৰদুছ আলী ৷ বিগত 11 জুনত বিলাসীপাৰাৰ ভাষানীগাঁৱৰ এগৰাকী নাবালিকা ছাত্ৰীক অপহৰণ কৰাৰ অভিযোগত আটক কৰা হৈছিল ফিৰদুছ আলীক ৷ অপহৰণ হোৱা নাৱালিকা ছাত্ৰী গৰাকীৰ পৰিয়ালে লক্ষীগঞ্জ আৰক্ষী চকীত ঘটনাৰ সন্দৰ্ভত দাখিল কৰা অভিযোগৰ ভিত্তিত 569/19 নম্বৰ আৰু 366 ক/ 342 ধাৰাত গোচৰ পঞ্জীয়ন কৰি তদন্ত অব্যাহত ৰাখে ৷

আৰক্ষীয়ে অভিযান চলাই বিগত 5 জুনৰ দিনা অপহৃতা ছাত্ৰী গৰাকীক উদ্ধাৰ কৰাৰ লগতে লক্ষীগঞ্জত আটক কৰিছিল অপহৰণকাৰী ফিৰদুছ আলীক । ন্যায়িক জিম্মাৰ 14 দিন উকলি যোৱাৰ পিচত আজি মহকুমা আদালতত হাজিৰ কৰোৱা হৈছিল আচামীজনক ৷ আনহাতে,মহকুমা আদালতৰ UTP ৰ আৰক্ষী বিষয়া সমেশ্বৰ শইকীয়া,কনিষ্টবল ছিৰাজুল হক, হায়দৰ আলী আৰু বাণীকান্ত বৰ্মনৰ গাফিলতিৰ বাবে আচামীজন পলায়ন কৰিবলৈ সক্ষম হোৱা বুলি অভিযোগ উত্থাপন হৈছে ৷