বিলাসীপাৰাত আৰক্ষীৰ ড্ৰাগচ বিৰোধী অভিযান : আটক 1

এক গোপন সুত্ৰৰ ভিত্তিত নয়াহাটত চলোৱা এই অভিযানত আৰক্ষীয়ে বৃহৎ পৰিমাণৰ নিচা জাতীয় সামগ্ৰী জব্দ কৰে ৷

পশ্চিম বিলাসীপাৰা , 18 মে':ধুবুৰী জিলাৰ বিলাসীপাৰাস্থিত নয়াহাটত আৰক্ষীৰ অভিযানত বৃহৎ পৰিমাণৰ ড্ৰাগচ জব্দ হয় ৷ লগতে এই সন্দৰ্ভত আৰক্ষীয়ে কুখ্যাত ড্ৰাগচ ব্যৱসায়ী শ্বাহ আলম খানক আটক কৰে ৷ আটকাধীন ড্ৰাগচ মাফিয়া জনৰ ঘৰ নয়াহাট আৰক্ষী চকীৰ অন্তৰ্গত তামাকুবাৰী প্ৰথম খণ্ড গাঁৱত বুলি জানিব পৰা গৈছে ৷

শুকুৰবাৰে নিশা এক গোপন সুত্ৰৰ ভিত্তিত আৰক্ষীয়ে নয়াহাটত চলোৱা এই অভিযানত, আৰক্ষীয়ে ড্ৰাগচ মাফিয়া জনৰ পৰা 57 বটল কফ চিৰাফ, পাঁচ শতাধিক "Spasphen Plus" আৰু দুই শতাধিক "Netrox 10" নামৰ নিচা জাতীয় টেবলেট জব্দ কৰে ৷ উল্লেখ্য যে সম্প্ৰতি নয়াহাট অঞ্চলত , বিলাসীপাৰা আৰক্ষীৰ ছত্ৰছায়াত তীৰ-জুৱা আদি অপৰাধ জনিত ঘটনাই ব্যাপক গা কৰি উঠিছে বুলি ৰাইজে অভিযোগ তুলে ৷ সেয়ে এই ক্ষেত্ৰত জিলা প্ৰশাসনৰ লগতে চৰকাৰক বিহিত ব্যৱস্থা গ্ৰহণৰ দাবী তুলে নয়াহাট অঞ্চলৰ সচেতন যুৱ মঞ্চই ৷