মানকাচৰত বানৰ তাণ্ডৱ

হাটশিঙিমাৰীত বানৰ বিভীষিকা,মেঘালয়ৰ পৰা নামি অহা পানীয়ে বুৰাই পেলাইছে মানকাচৰৰ বিস্তীৰ্ণ অঞ্চল।

ধুবুৰী,12জুলাইঃ বিগত কেইবাদিন ধৰি হৈ থকা নেৰানেপেৰা বৰষুনৰ ফলত চুবুৰীয়া ৰাজ্য মেঘালয়ৰ পৰা নামি অহা পানীয়ে বুৰাই পেলাইছে দক্ষিণ শালমাৰা মানকাচৰ জিলাৰ বহুতো গাওঁ ।

বিশেষকৈ জিলাখনৰ হাটশিঙিমাৰী, খাৰুৱাবান্ধা, ৰঘুপাৰা, ময়না বান্ধা, ফেকামাৰী, মানুল্লাপাৰা আদি গাওঁ প্লাবিত হৈ পৰিছে । ফলত উক্ত গাৱঁৰ বহুতো মানুহৰ বাসগৃহত পানী সোমোৱাৰ লগতে বুৰ গৈছে বহুতো মৎস পালনৰ পুখুৰী।

মানকাচৰত বানৰ তাণ্ডৱ

হাটশিঙিমাৰী-পিপুলবাৰী সংযোগী পকী পথৰ ওপৰেদি বৈ গৈছে পানী । উল্লেখ্য যে, উক্ত অঞ্চলৰ কেইবাটাও কালভাৰ্টৰ মুখ বন্ধ হৈ থকাৰ ফলত কালভাৰ্টৰে পানী বৈ যাব নোৱাৰাত বিস্তৰ ক্ষতি সাধন হৈছে উক্ত অঞ্চলবাসী ৰাইজৰ । বন্ধ হৈ থকা কালভাৰ্টৰ মুখ খুলি দিয়াৰ বাবে প্ৰশাসনক দাবী জনাই স্থানীয় ৰাইজে । জিলা প্ৰশাসনৰ ফালৰ পৰা কোনো ব্যৱস্থা গ্ৰহণ নকৰাত সম্প্ৰতি বানাক্ৰান্ত ৰাইজৰ মাজত হাহাকাৰ পৰিস্থিতিৰ সৃষ্টি হৈছে ৷
লগতে পঢ়কঃহাস্পতালত কেনেধৰনৰ পৰিৱেশ পাইছিল কৰ'ণা ৰোগীয়ে?