বিলাসীপাৰা,১৫ জুন : শুকুৰাবৰে বিলাসীপাৰাত ধুবুৰী জিলা পৰিবহণ বিভাগে আৰক্ষীৰ সহযোগত এক অভিযান চলাই ১৮ খন অবৈধ ই-ৰিক্সা জব্দ কৰে । জিলা পৰিবহণ বিভাগৰ যান বাহন পৰিদৰ্শকৰ নেতৃত্বত চলোৱা এই অভিযানত আৰক্ষীয়ে নথি পত্ৰ বিহীন ভাৱে চলাচল কৰা ই-ৰিক্সা জব্দ কৰে ।
জব্দকৃত ই-ৰিক্সাসমূহ বিলাসীপাৰা জিলা পৰিবহণ বিভাগে, বিলাসীপাৰা আৰক্ষীক গতাই দিয়ে। অৱশ্যে আৰক্ষীয়ে নথি পত্ৰ বিহীন ই-ৰিক্সা সমূহ জব্দ কৰে যদিও কোনো এজন চালকক আটক কৰা নাই। ইপিনে অহা দুই মাহৰ ভিতৰত পঞ্জীয়ন নথকা ই ৰিক্সা সমূহৰ পঞ্জীয়ন কৰাৰ লগতে চালকৰ অনুজ্ঞাপত্ৰ উলিয়াই নিবলৈ নিৰ্দেশ দিয়ে পৰিদৰ্শক গৰাকীয়ে ৷ অন্যথা জিলা পৰিবহণ বিভাগটোৱে ইয়াৰ বিৰুদ্ধে কঠোৰ ব্যৱস্থা গ্ৰহণ কৰিব বুলি জনাই পৰিদৰ্শক গৰাকীয়ে ৷ উল্লেখ্য যে বিলাসীপাৰা চহৰৰ লগতে ইয়াৰ পাৰ্শ্বৱৰ্তী অঞ্চলত নথি পত্ৰ বিহীন ই-ৰিক্সাৰ দৌৰাত্ম্যই পথচাৰীক অতীষ্ঠ কৰি তুলাৰ অভিযোগ উত্থাপিত হৈ আহিছে । তেনে সময়তে জিলা পৰিবহণ বিভাগৰ এনে অভিযান ব্যাপক চৰ্চিত বিষয় হৈ পৰিছে ।