ধুবুৰীৰ ঐতিহাসিক পূজামণ্ডপত দেৱীক আদৰাৰ প্ৰস্তুতি

এইবেলি 69 বছৰত ভৰি দিলে ধুবুৰী সবুজ সংঘৰ পূজা মণ্ডপে ৷ দক্ষিণ ভাৰতৰ তামিলনাডুৰ মিনাক্ষী টেম্পেলৰ আৰ্হিত নিৰ্মান কৰা হৈছে সবুজ সংঘৰ পূজামণ্ডপটো ৷ ধুবুৰীৰ আন এক প্ৰসিদ্ধ পূজা মণ্ডপ হ’ল ৯৩ বছৰত ভৰি দিয়া ধুবুৰীৰ কালিবাৰী মন্দিৰ পূজামণ্ডপ ৷ ষষ্ঠীৰ সন্ধিয়া ধৰ্মীয় পৰম্পৰা অনুসৰি কালিবাৰী মন্দিৰৰ মণ্ডপত প্ৰতিষ্ঠা কৰা হয় দেৱী দূৰ্গাক ৷

ধুবুৰী, 4 অক্টোবৰঃ আজি পৱিত্ৰ মহাষষ্ঠী ৷ ঢাক-ঢোলৰ শব্দত মুখৰিত হৈ পৰিছে ৰাজ্যৰ প্ৰতিখন পূজাস্থলী ৷ এইবেলি 69 বছৰত ভৰি দিলে ধুবুৰী সবুজ সংঘৰ পূজা মণ্ডপে ৷ ধুবুৰীৰ প্ৰমথেছ বৰুৱা খেল পথাৰত প্ৰতিবছৰেই সবুজ সংঘই উদযাপন কৰি আহিছে দূৰ্গাপূজা ৷ দক্ষিণ ভাৰতৰ তামিলনাডুৰ মিনাক্ষী টেম্পেলৰ আৰ্হিত নিৰ্মান কৰা হৈছে সবুজ সংঘৰ পূজামণ্ডপটো ৷ ধুবুৰীৰ অন্যতম আকৰ্ষণৰ কেন্দ্ৰবিন্দু এই পূজামণ্ডপটো দৰ্শনাৰ্থীৰ আকৰ্ষণৰ অন্যতম কেন্দ্ৰবিন্দু হৈ পৰিছে ৷ এই পূজা মণ্ডপটোত মূল দুৰ্গা প্ৰতিমাৰ উপৰিও প্ৰদৰ্শনীমূলক হিচাপে ৰখা হ’ব প্ৰদীপ কুমাৰ ঘোষ নামৰ এগৰাকী শিল্পীৰ নিপুণ হাতৰ পৰশত গঢ় লৈ উঠা চাবোনৰে নিৰ্মিত অতিকৈ ক্ষুদ্ৰতম প্ৰতিমা ৷ লগতে আন একাংশ যুৱকৰ তৎপৰতাত বিভিন্ন থলুৱা বাঁহ শিল্পৰ বিভিন্ন সামগ্ৰীও প্ৰদৰ্শনীমূলক ভাৱে ৰখা হ'ব এইখন পূজা মণ্ডপখনত ৷

ধুবুৰীৰ আন এখন অন্যতম পুৰণি পূজামণ্ডপ হ’ল ধুবুৰীৰ কালিবাৰী মন্দিৰৰ পূজা ৷ ৯৩ বছৰত ভৰি দিয়া ধুবুৰীৰ কালিবাৰী মন্দিৰত ষষ্ঠীৰ সন্ধিয়া ধৰ্মীয় পৰম্পৰা অনুসৰি মণ্ডপত প্ৰতিষ্ঠা কৰা হয় দেৱীৰ প্ৰতিমা ৷ ১৯২৮ চনতে ধুবুৰী চহৰত স্থাপন কৰা হৈছিল এই মন্দিৰটো ৷ শুকুৰবাৰে মহা ষষ্ঠীৰ সন্ধিয়া বেল বৰণেৰে দেৱী দূৰ্গাক মণ্ডপত প্ৰতিষ্ঠা কৰা হয় । এই উপলক্ষে মন্দিৰ প্ৰাঙ্গনত শ শ ভক্তৰ সমাগম হয় ৷

উল্লেখ্য যে, শুকুৰবাৰৰ দিনটোতে পূজা উপলক্ষে ধুবুৰীৰ প্ৰায় তিনিশ গৰাকী অসহায় দৰিদ্ৰ মহিলাৰ মাজত কালিবাৰী ট্ৰাষ্টি বোৰ্ডৰ ফালৰ পৰা বস্ত্ৰ বিতৰণ কৰা হয় ৷