ধুবুৰী, 6 ডিচেম্বৰ : ধুবুৰীৰ মধুশৌলমাৰী গাঁৱত গাত কেৰাচিন ঢালি পত্নীক হত্যা কৰাৰ অভিযোগ উত্থাপন হৈছে স্বামী পৰিয়ালৰ বিৰুদ্ধে । ধুবুৰী জিলাৰ মধুশৌলমাৰী গাঁৱত যোৱা ২৪ নৱেম্বৰ তাৰিখে সংঘটিত হৈছিল ভয়ংকৰ কাণ্ডটো । ৰছিদা বিবি নামৰ এগৰাকী বোৱাৰীক স্বামী গৃহৰ লোকে প্ৰাণে মৰাৰ বাবে শৰীৰত জুই লগাই দিয়াৰ অভিযোগ উত্থাপন হৈছে । উক্ত ঘটনাৰ পিছতেই স্বামী আমিনুৰ ৰহমানে মহিলাগৰাকীক হাস্পতালত ভৰ্তি কৰায় যদিও পৰৱৰ্তী সময়ত হাস্পতালৰ পৰা পলায়ন কৰে স্বামীসহ পৰিয়ালৰ লোকে ।
ঘটনাৰ খবৰ লাভ কৰিয়েই মহিলাগৰাকীৰ পৰিয়ালৰ লোক আহি উপস্থিত হয় ধুবুৰী অসামৰিক চিকিৎলালয়ত । জীয়েকৰ স্বীকাৰোক্তিৰ ভিত্তিত ২৭ নৱেম্বৰত পিতৃয়ে মূল অভিযুক্ত তিনিজনৰ বিৰুদ্ধে গৌৰীপুৰ থানাত গোচৰ ৰুজু কৰায় । পিতৃয়ে দাখিল কৰা গোচৰৰ ভিত্তিত গৌৰীপুৰ আৰক্ষীৰ তদন্তকাৰী বিষয়া আব্দুল জলিলে তদন্ত আৰম্ভ কৰে । তদন্তত অগ্নিদগ্ধ হোৱা এটি সন্তানৰ মাতৃ ৰছিদা বিবিয়ে আৰক্ষীক ঘটনা সম্পৰ্কত তিনিগৰাকী অভিযুক্তই কেনেকৈ শৰীৰত জুই লগাই দিছিল তাৰ বিৱৰণী দিছিল বুলি পৰিয়ালৰ লোকে জানিব দিয়ে । কিন্তু ইয়াৰ পাছতো আজিকোপতি আৰক্ষীয়ে আটক নকৰিলে এজনো অভিযুক্তক ৷