ধুবুৰী, 11 নৱেম্বৰ: প্ৰাপ্যৰ দাবীত সোমবাৰে ৰাজ্যৰ ভিন্ন প্ৰান্তৰ লগতে ধুবুৰীত উত্তাল প্ৰতিবাদ সাব্যস্ত কৰে হাজাৰ-হাজাৰ ৰন্ধনকৰ্মীয়ে । চি আই টি ইউ আৰু সদৌ অসম নিৰ্মাণ শ্ৰমিক ইউনিয়ন জিলা সমিতিৰ সহযোগত সদৌ অসম মধ্যাহ্ন ভোজন কৰ্মচাৰী সন্থাই চহৰখনত বিশাল প্ৰতিবাদী বাহিৰ কৰে । ধুবুৰী ৰে'ল ষ্টেচনৰ পৰা সহস্ৰাধিক প্ৰতিবাদকাৰীয়ে শ্ৰম আৰু কল্যাণ বিভাগৰ সহকাৰী শ্ৰম আয়ুক্তৰ কাৰ্যালয়ৰ সমুখত সমবেত হৈ কাৰ্যালয়টোৰ সমুখৰ পথটো অৱৰোধ কৰি ৰাজপথত বহি প্ৰতিবাদ সাব্যস্ত কৰে।
NGO ৰ দালাল মোডী চৰকাৰ, NGO ৰ দালাল মুখ্যমন্ত্ৰী সোণোৱাল আৰু শিক্ষামন্ত্ৰী মূর্দাবাদ ধ্বনিৰে পৰিৱেশ উত্তাল কৰিলে প্ৰতিবাদকাৰী সকলে ৷ উল্লেখযোগ্য যে, জিলাখনৰ দায়িত্ব লাভ কৰা NGO টোৱে ২০২০ চনৰ জানুৱাৰী মাহৰ পৰা জিলাখনত মধ্যাহ্ন ভোজনৰ খাদ্য বিতৰণ কৰিব বুলি জানিবলৈ দিয়ে ৷ আনহাতে উক্ত NGO টোৱে যদিহে ধুবুৰী জিলাত খাদ্য বিতৰণৰ বাবে প্ৰৱেশ কৰে তেন্তে NGO ৰ বাবে পৰিণাম অতি ভয়াৱহ হ'ব বুলি সকীয়নি প্ৰদান কৰে ৰন্ধনকৰ্মীসকলে।