ধুবুৰীত চাঞ্চল্যকৰ ঘটনাঃ দুৰ্বৃত্তৰ আক্ৰমণত আহত পিতৃ কন্যা

ধুবুৰী জিলাৰ অন্তৰ্গত গৌৰীপুৰত নিশা দুৰ্বৃত্তৰ দলৰ চোকা অস্ত্ৰৰে উপৰ্যুপৰি আক্ৰমণ পিতৃ কন্যাৰ ওপৰত, কন্যাক বলপূৰ্বকভাৱে অপহৰণৰ চেষ্টা

ধুবুৰী, 6 আগষ্টঃ সোমবাৰে নিশা ধুবুৰী জিলাৰ অন্তৰ্গত গৌৰীপুৰৰ তিনি নম্বৰ ৱাৰ্ডত দুজনীয়া দুৰ্বৃত্তৰ এটা দলে আক্ৰমণ কৰে পিতৃ আৰু কন্যাৰ ওপৰত ৷ ঘটনা অনুসৰি, গৌৰীপুৰৰ তিনি নম্বৰ ৱাৰ্ডৰ দিলীপ আগৰৱাল নামৰ লোকজনৰ বাসগৃহত নিশা শিলগুটি নিক্ষেপ কৰি খিৰিকী ভাঙি ঘৰৰ ভিতৰত প্ৰৱেশ কৰাৰ চেষ্টা কৰে দুৰ্বৃত্তৰ দলটোৱে ৷ এনেতে দিলীপ আগৰৱাল আৰু তেওঁৰ কন্যা শ্ৰুতি আগৰৱালে ঘৰৰ বাহিৰলৈ আহি দুৰ্বৃত্তক বাধা প্ৰধান কৰিবলৈ লওঁতেই আগৰৱালাৰ কন্যাক বলপূৰ্বকভাৱে গাড়ীত উঠাই অপহৰণ কৰিবলৈ চেষ্টা কৰে ৷ কিন্তু অপহৰণত ব্যৰ্থ হৈ দুৰ্বৃত্তৰ দলটোৱে চোকা অস্ত্ৰৰে উপৰ্যুপৰি আক্ৰমণ কৰে পিতৃ কন্যাৰ ওপৰত ৷ আক্ৰমণৰ ফলত দিলীপ আগৰৱালৰ শৰীৰৰ কেইবাটাও অংশ আঘাপ্ৰাপ্ত হোৱাৰ উপৰিও কন্যা শ্ৰুতি আগৰৱালো গুৰুতৰভাবে আহত হয়৷ ঘটনাৰ পিছতেই স্থানীয় একাংশ ৰাইজে ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰি আহত দুই পিতৃ কন্যাক ধুবুৰী জিলা অসামৰিক চিকিৎসালয়লৈ প্ৰেৰণ কৰাৰ বিপৰীতে কাজিবৰ ৰহমান নামৰ এজন দুৰ্বৃত্তক আটক কৰি গৌৰীপুৰ আৰক্ষীক গতাই দিয়ে ৷ ইপিনে আজি সংকটজনক অৱস্থাত পিতৃ কন্যা দুয়োকে উন্নত চিকিৎসাৰ বাবে গুৱাহাটী চিকিৎসা মহাবিদ্যালয়লৈ প্ৰেৰণ কৰা হৈছে বুলি জানিব পৰা গৈছে ৷ ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে যদিও কিয় দুৰ্বৃত্তৰ দলটোৱে আক্ৰমণ সংঘটিত কৰিলে সেই কথা বৰ্তমানলৈকে পোহৰলৈ অহা নাই ৷