কিয় উত্তেজিত হৈ পৰিল ধুবুৰীৰ ই-ৰিক্সা চালক?

ই ৰিক্সা এৰি ধুবুৰী পৌৰসভা কাৰ্যালয়ত শতাধিক ই ৰিক্সা চালকে সাব্যস্ত কৰে উত্তাল প্ৰতিবাদ

ধুবুৰী,১৩ জুনঃ ধুবুৰীত ই-ৰিক্সা চালকৰ প্ৰতিবাদ । পৌৰসভা আৰু পৰিবহণ বিভাগৰ বিৰুদ্ধে ক্ষোভিত ই-ৰিক্সা চালকসকল । বৃহস্পতিবাৰে শতাধিক ই-ৰিক্সা চালকে ধুবুৰী পৌৰসভা কাৰ্যালয়ত সাব্যস্ত কৰে তীব্ৰ প্ৰতিবাদ । ধুবুৰী পৌৰসভা, পৰিবহণ বিভাগ আৰু জিলা প্ৰশাসনৰ বিৰুদ্ধে বিভিন্ন শ্ল'গান দি উত্তাল কৰি তোলে কাৰ্যালয়টোৰ চৌহদ । বিগত প্ৰায় তিনি বছৰৰ পৰা বহু কষ্ট কৰি বেংকৰ পৰা ঋণেৰে ই-ৰিক্সা ক্ৰয় কৰি এইসকল চালকে পৰিয়াল পোহপাল দি আহিছে। দিনটো ৰিক্সা চলাই চাৰিশৰ পৰা পাঁচশ টকা উপাৰ্জন কৰি পৰিয়াল পোহপাল দি আছে এইসকল ৰিক্সা চালকে । সেইখিনিলৈকে সকলো থিকেই আছিল । কিন্তু প্ৰথমাৱস্থাত পৌৰসভাই পঞ্জীয়ন নম্বৰ দিয়াৰ সিদ্ধান্ত লৈছিল যদিও পৰৱৰ্তী সময়ত জিলা পৰিবহণ বিভাগে পঞ্জীয়ন নম্বৰ দিয়াৰ সিদ্ধান্ত গ্ৰহণ কৰে । সেইমতে এমাহমান পূৰ্বে এবাৰ ই-ৰিক্সা সমূহ জব্দ কৰি আঢ়ৈ হাজাৰ টকাকৈ জৰিমনালৈ অহা ছেপ্টেম্বৰ মাহলৈকে চাৰি মাহ সময় সীমা বান্ধি দি পঞ্জীয়ন কৰিবৰ বাবে নিৰ্দেশ দিছিল জিলা পৰিবহণ বিভাগে । যদিও চাৰি মাহ পাৰ নৌহওঁতেই বৃহস্পতিবাৰে পৰিবহণ বিভাগৰ নিৰ্দেশমতেই যান-বাহন আৰক্ষীয়ে ১৪০ খন ই-ৰিক্সা জব্দ কৰে । ফলত উপাৰ্জন বন্ধ হৈ যোৱাৰ উপক্ৰম হোৱাত হাহাকাৰ পৰিস্থিতিৰ সৃষ্টি হৈছে এইসকল চালকৰ মাজত ।

উল্লেখযোগ্য যে, প্ৰথমাৱস্থাত ধুবুৰীত বহু ব্যৱসায়ীয়ে চীনৰ পৰা আমদানি হোৱা ই-ৰিক্সা ক্ৰয় কৰিছিল যদিও সম্পূৰ্ণ জি এছ টি আদায় দিছিল । সেই সময়ত ব্যৱসায়ীসকলক চীনৰ ই-ৰিক্সাসমূহ বিক্ৰী কৰাৰ বাবে দোকানৰ অনুজ্ঞাপত্ৰ প্ৰদান কৰিছিল ধুবুৰী পৌৰসভাই । যদিও হঠাৎ চীনৰ ই-ৰিক্সাৰ চলাচল বন্ধ কৰি দিয়াৰ পিছত প্ৰতিক্ৰিয়াৰ সৃষ্টি হৈছে সকলোৰে মাজত । পৰিবহণ বিভাগৰ চাৰি মাহৰ সময়সীমা পাৰ নৌহওঁতেই বৃহস্পতিবাৰে পুনৰ জাননী নিদিয়াকৈ ই-ৰিক্সাসমূহ জব্দ কৰি প্ৰতিখন ই-ৰিক্সাৰ পৰা আঢ়ৈ হাজাৰ টকা জৰিমনা বিহা হৈছে । ইয়াক লৈ ক্ষোভিত হৈ পৰা ই-ৰিক্সা চালকসকলে ধুবুৰী পৌৰসভাৰ কাৰ্যালয়ত উপস্থিত হৈ এইদৰে প্ৰতিবাদমুখী হৈ উঠে ।