ধুবুৰী, 5 মাৰ্চ:অসম বিধান সভাৰ নিৰ্বাচনৰ দিন ঘোষণা কৰাৰ লগে লগে পূৰ্ণ গতিত প্ৰস্তুতি চলাইছে ধুবুৰী জিলা প্ৰশাসনে ৷ ধুবুৰী জিলা উপায়ুক্ত দেৱ কুমাৰ কলিতাই বৃহস্পতিবাৰে সন্ধিয়া এখন সংবাদমেল সম্বোধন কৰি নিৰ্বাচনৰ বাবে প্ৰশাসন সম্পূৰ্ণৰূপে সাজু বুলি সদৰী কৰে ৷ উপায়ুক্ত কলিতাই কয় যে, ধুবুৰী জিলাৰ পাঁচটা বিধানসভা সমষ্টিৰ ভোটগ্ৰহণৰ বাবে প্ৰশাসন ইতিমধ্যে সাজু হৈছে ৷
অসম বিধান সভা নিৰ্বাচনলৈ সাজু হৈছে ধুবুৰী জিলা প্ৰশাসন
জিলা নিৰ্বাচনী বিষয়া তথা জিলা উপায়ুক্ত কলিতাই উল্লেখ কৰা মতে, ধুবুৰী জিলাৰ অন্তৰ্গত ধুবুৰী, গৌৰীপুৰ গোলোকগঞ্জ, বিলাসীপাৰা পূব আৰু বিলাসীপাৰা পশ্চিম সমষ্টিত মুঠ ভোটাৰৰ সংখ্যা 9 লাখ 51 হেজাৰ 543 গৰাকী ৷ এইবাৰ জিলাখনত নতুন ভোটাৰৰ সংখ্যা 6262 গৰাকী বুলি তেঁও জানিবলৈ দিয়ে ৷ 8০ বছৰ উৰ্ধৰ ব্যক্তিৰ লগতে দিবাংগ আৰু ক'ভিড-19 আক্রান্ত সকলে প'ষ্টেল ভোট দিব পাৰিব বুলি সংবাদমেলখনত উল্লেখ কৰা হয় ৷