ধুবুৰী, 9 ফেব্ৰুৱাৰীঃ আজি মহাবীৰ চিলাৰায়ৰ 510 তম জন্ম জয়ন্তী উপলক্ষে ধুবুৰীৰ গৌৰীপুৰত, বৰ্ণাঢ্য কাৰ্যসূচীৰে পালন কৰা হয় চিলাৰায় দিৱস ৷ গৌৰীপুৰ চিলাৰায় উদ্যানত পালন কৰা এই কাৰ্য্যসূচীত অংশগ্ৰহণ কৰে, গোলকগঞ্জ বিধানসভা সমষ্টিৰ বিধায়ক অশ্বিনী ৰায় সৰকাৰ আৰু বিপিএফ নেতা তথা গৌৰীপুৰৰ প্ৰাক্তন বিধায়ক বনেন্দ্ৰ কুমাৰ মুছাহাৰীয়ে ৷ এই অনুষ্ঠানত উপস্থিত থাকি বিধায়ক অশ্বিনী ৰায় সৰকাৰে, গোলকগঞ্জত এখন চিলাৰায় কলাক্ষেত্ৰ নিৰ্মাণৰ সিদ্ধান্ত লোৱাৰ লগতে বঙাইগাঁৱতো আন এক প্ৰকল্প নিৰ্মাণৰ সিদ্ধান্ত গ্ৰহণ কৰা বুলি উল্লেখ কৰে ৷
কাকপথাৰঃ ইফালে তিনিচুকীয়াৰ কাকপথাৰতো 510 তম চিলাৰায় দিৱস উপলক্ষে কাকপথাৰ আঞ্চলিক সাংস্কৃতিক সংঘত, পোনপ্ৰথম বাৰৰ বাবে তিনিচুকীয়া জিলা আৰু কাকপথাৰ আঞ্চলিক কোচ ৰাজবংশী সংগ্ৰাম সমিতিৰ লগতে কোচ ৰাজবংশী মহিলা সংগ্ৰাম সমিতিৰ উদ্যোগত চিলাৰায় দিৱস পালন কৰা হয় ৷ এই অনুষ্ঠানত শোভাযাত্ৰা, চিত্ৰাংকণ প্ৰতিযোগিতাৰ লগতে এখন মুকলি সভাও অনুষ্ঠিত কৰা হয় ৷