ধুবুৰী,28 অক্টোবৰ:ক্ৰমাৎ ওচৰ চাপিছে পৰৱৰ্তী অসম বিধানসভাৰ নিৰ্বাচনৰ দিন ৷ নিৰ্বাচনক কেন্দ্ৰ কৰি যুদ্ধকালীন প্ৰস্তুতি চলিছে ৰাজ্যৰ প্ৰতিটো ৰাজনৈতিক দলৰ মাজত ৷ জিলাই জিলাই অনুষ্ঠিত হৈছে নিৰ্বাচনীকেন্দ্ৰিক প্ৰচাৰ সভা ৷ তেনে সময়তে অসম ৰাজ্যিক বিজেপিৰ সংখ্যালঘু মৰ্চাৰ কাৰ্য নিৰ্বাহকত অংশগ্ৰহণৰ উদ্দেশ্যে ধুবুৰীত উপস্থিত হৈছে প্ৰাক্তন বিধায়ক তথা ৰাজ্যিক বিজেপিৰ সংখ্যালঘু মৰ্চাৰ সভাপতি মুক্তাৰ হুছেইন খান ৷ সভাপতিগৰাকী ধুবুৰীত উপস্থিত হোৱাৰ পিছতে এক বাইক ৰেলীৰ আয়োজন কৰে জিলা টাউন মণ্ডলৰ সংখ্যালঘু মৰ্চাৰ সদস্যসকলে ৷ মৰ্চাৰ সভাপতি ৰেজ্জাক খানৰ নেতৃত্বত উলিওৱা উক্ত বাইক ৰেলীৰ সামৰণি পৰে ফলিমাৰীত ৷ ফলিমাৰীত অনুষ্ঠিত অনুষ্ঠিত কাৰ্য নিৰ্বাহক সভাত অংশগ্ৰহণ কৰে মুক্তাৰ হুছেইন খানৰ লগতে জিলা বিজেপিৰ সভাপতি ডাঃ দেৱময় সান্যালে ৷
ইফালে,এই সভাৰ পোনতে ঘটে এক অথন্তৰ ৷ সভা অনুষ্ঠিত হোৱাৰ পূৰ্বে উত্তোলন কৰা দলীয় পতাকাখন ওলোটাকৈ উৰাতহে সচেতন হয় বিজেপিৰ কৰ্মকৰ্তাসকল ৷ ধুবুৰী জিলা বিজেপিৰ সভাপতি ডাঃ দেৱময় সান্যালে ওলোটাকৈ উত্তোলন কৰি দলীয় পতাকাখন ৷ এই ঘটনা দৃষ্টিগোচৰ হোৱাৰ পিছতে পতাকাখন নমাই আনি পুনৰ উত্তোলন কৰা হয় ৷ সভাত অংশগ্ৰহণ কৰি ৰাজ্যিক বিজেপিৰ সংখ্যালঘু মৰ্চাৰ সভাপতিগৰাকীয়ে পৰৱৰ্তী নিৰ্বাচনত দলটোৱে 100 আসন লাভ কৰিব বুলি দাবী উত্থাপন কৰে ৷