অবৈধ নিচা জাতীয় দ্ৰব্যৰ ঘাটিত পৰিণত বিলাসীপাৰাৰ নয়াহাট

ৰাজ্যত দিনক দিনে নিচা জাতীয় সামগ্ৰীৰ অবৈধ ব্যৱসায় বৃদ্ধি পোৱা পৰিলক্ষিত হৈছে ৷ বিভিন্ন প্ৰান্তত আৰক্ষীয়ে অভিযান চলাই নিচা জাতীয় সামগ্ৰী জব্দ কৰিবলৈ সক্ষম হৈছে ৷ বিলাসীপাৰত বৃহস্পতিবাৰে আৰক্ষীয়ে অভিযান চলাই বৃহৎ পৰিমানৰ নিচা জাতীয় ঔষধ জব্দ কৰে ৷

পশ্চিম বিলাসীপাৰা,2 অক্টোবৰঃ অবৈধ নিচা জাতীয় দ্ৰব্যৰ ঘাটিত পৰিণত হৈছে বিলাসীপাৰাৰ নয়াহাট ৷ বৃহস্পতিবাৰে নিশা চলোৱা অভিযানত বৃহৎ পৰিমাণৰ অবৈধ নিচা জাতীয় ঔষধ জব্দ কৰিবলৈ সক্ষম হৈছে আৰক্ষী ৷ বিলাসীপাৰা মহকুমা আৰক্ষী বিষয়াৰ নেতৃত্বত যোৱা নয়াহাট আৰক্ষীয়ে নিশা জব্দ কৰে নিচা জাতীয় ঔষধ সমূহ ৷ নয়াহাট আৰক্ষী চকীৰ অন্তৰ্গত ফকিৰানিৰঝাৰ গাঁৱত আৰক্ষীয়ে অভিযান চলাই জব্দ কৰে এই ঔষধসমূহ ৷

উল্লেখযোগ্য যে, গোপন সুত্ৰৰ ভিত্তিত চলোৱা অভিযানত আৰক্ষীয়ে গাঁওখনৰ জাহানুৰ আলী ওৰফে নাদুৰ ঘৰত বিক্ৰীৰ বাবে মজুত ৰখা 1300 নিচা জাতীয় টেবলেট জব্দ কৰে ৷ অৱশ্যে আৰক্ষীৰ উপস্থিতিৰ উমান জাহানুৰ আলী নামৰ নিচা জাতীয় ঔষধ সৰবাৰাহকাৰীটো পলায় যাবলৈ সক্ষম হয় ৷ ইপিনে অতি শীঘ্ৰে জাহানুৰক গ্ৰেপ্তাৰ কৰিবলৈ সক্ষম হ’ব বুলি মহকুমা আৰক্ষী বিষয়াজনে জানিবলৈ দিয়ে ৷

লগতে পঢ়কঃ বিটিআৰ সন্দৰ্ভত বিস্ফোৰক মন্তব্য সাংসদ নৱ শৰণীয়াৰ