গৌৰীপুৰত গড়কপ্তানি পথ নিৰ্মাণত অনিয়মৰ অভিযোগ

ধুবুৰীৰ গৌৰীপুৰৰ এখন গড়কপ্তানি পথ নিৰ্মাণৰ নামত ব্যাপক দুৰ্নীতি সংঘটিত হোৱাৰ অভিযোগ ৰাইজৰ । নাম ফলক নোহোৱাকৈয়ে প্ৰায় সম্পন্ন পথ নিৰ্মাণৰ কাম ।

ধুবুৰী, 28 নৱেম্বৰ : ধুবুৰীৰ গৌৰীপুৰ বিধানসভা সমষ্টিৰ টিয়ামাৰী প্ৰথম খণ্ড এলেকাৰ গড়কপ্তানি পথ নিৰ্মাণৰ ক্ষেত্ৰত বিভাগীয় বিষয়া আৰু ঠিকাদাৰে নিজৰ ইচ্ছামতেই নির্মাণকাৰ্য চলোৱাৰ অভিযোগ । অভিযোগ অনুসৰি কিছুদিন পূৰ্বে গৌৰীপুৰ ৰাষ্ট্ৰীয় ঘাই পথ সংলগ্ন এটা গুৰুত্বপূৰ্ণ পথ নির্মাণকাৰ্য আৰম্ভ হৈছে । পূৰ্ণোদ্যমে চলিছে পথটোৰ নির্মাণকাৰ্য । নির্মাণকাৰ্য প্ৰায় সমাপ্ত হোৱাৰ দিশে যদিও এতিয়ালৈকে পথটোৰ কোনো ঠাইত নাম ফলক আঁৰি দিয়া পৰিলক্ষিত হোৱা নাই । ফলত কোন আঁচনিৰ অধীনত কিমান টকা ব্যয় সাপেক্ষে আৰু কোন ঠিকাদাৰ পথটো নিৰ্মাণৰ দায়িত্বত আছে সেই তথ্য জ্ঞাত নহয় ৰাইজৰ । আনকি কি কি নীতি-নিয়মৰ মাজেৰে পথটো নিৰ্মাণ কৰা হৈছে সেই বিষয়ে কোনো তথ্য ৰাজহুৱা কৰা হোৱা নাই বুলি অভিযোগ তুলিছে ৰাইজে ।

উল্লেখযোগ্য যে, স্থানীয় ৰাইজক অন্ধকাৰত ৰাখি ৪২ লক্ষাধিক টকাৰ কাম আঁচনি বহিঃৰ্ভূতভাৱে সম্পন্ন কৰি লাখ লাখ টকা আত্মসাতৰ ফন্দি কৰা হৈছে বুলি স্থানীয় ৰাইজৰ সন্দেহ । এইক্ষেত্ৰত উচিত তদন্ত কৰি ব্যৱস্থা গ্ৰহণৰ দাবীত ইতিমধ্যে জিলা উপায়ুক্তক এখন লিখিত অভিযোগ দাখিল কৰিছে স্থানীয় ৰাইজে । জানিব পৰা মতে, গৌৰীপুৰ সমষ্টিৰ স্থানীয় বিধায়ক নিজানুৰ ৰহমানৰ ভাতৃয়ে এই পথ নিৰ্মাণৰ ঠিকা লাভ কৰিছে । বিধায়ক ভাতৃ হোৱাৰ বাবেই আঁচনি বহিঃৰ্ভূতভাবে পথ নির্মাণ কৰি আহিছে নেকি বুলি প্ৰশ্ন উত্থাপন হৈছে ৰাইজৰ মাজত । এইক্ষেত্ৰত জিলা উপায়ুক্তই লিখিত অভিযোগ পোৱাৰ পিচত কি ব্যৱস্থা গ্ৰহণ কৰিব সেয়া লক্ষণীয় বিষয় হৈ পৰিছে ।

লগতে পঢ়ক :খোদ আৰক্ষীয়ে নিৰ্বাচনৰ প্ৰাৰ্থীক অপহৰণ কৰাৰ অভিযোগ