ধুবুৰী,8 নৱেম্বৰঃ ৰাজ্যৰ বিধান সভাৰ নিৰ্বাচনৰ দিন চমু চাপি অহাৰ সময়তে শাসক বিৰোধী বিভিন্ন ৰাজনৈতিক দলে নিৰ্বাচনী তৎপৰতা আৰম্ভ কৰিছে। তাৰ সমান্তৰাল ভাৱে এ আই ইউ ডি এফেও আৰম্ভ কৰিছে নিৰ্বাচনী তৎপৰতা। দেওবাৰে ধুবুৰী জিলা সমিতিৰ সৌজন্যত আৰু ২৩ নং ধুবুৰী সমষ্টি কমিটিৰ উদ্যোগত ধুবুৰীৰ কালাহাট ৰাজাকাটলী প্ৰেক্ষাগৃহত AIUDF দলৰ এখন কৰ্মীসভা অনুষ্ঠিত হয়। সভা খনত মূখ্য অতিথি হিচাপে উপস্থিতি থাকে এ আই ইউ ডি এফৰ কেন্দ্ৰীয় কমিটিৰ উপ সভাপতি মুফতি আব্দুল হক, নাওবৈছা সমষ্টিৰ বিধায়ক মামুন এমদাদুল হক ,ধুবুৰীৰ বিধায়ক নজৰুল হক আৰু স্থানীয় গৌৰীপুৰ সমষ্টিৰ বিধায়ক নিজানুৰ ৰহমান ৷ লগতে জিলা খনৰ বিভিন্ন প্ৰান্তৰ পৰা অহা AIUDF কৰ্মী সকলেও ভাগ লয় এই কৰ্মীসভাখনত ।
উক্ত সভাত এ আই ইউ ডি এফৰ ধুবুৰী সমষ্টিৰ বিধায়ক নজৰুল হকে সাংবাদিকৰ আগত কয় যে, সাংসদ বদৰুদ্দিন আজমল অসমৰ সকলো জাতি জনগোষ্ঠীৰ মানুহৰ হিতাৰ্থে কাম কৰি আহিছে। কিন্তু হিমন্তই অসমখনত অশান্তিৰ বাতাবৰণ সৃষ্টিৰ চেষ্টা চলাইছে। আনহাতে শিলচৰৰ বিমানবন্দৰত পাকিস্তান জিন্দাবাদ ধ্বনিৰ অন্তৰালত ৰাজনৈতিক ষড়যন্ত্ৰ থকা বুলি তেওঁ অভিযোগ উত্থাপন কৰে। কংগ্ৰেছ-এ আই ইউ ডি এফৰ মিত্ৰতাৰ ভয়ত হিমন্ত বাহিনী শংকিত হৈ চৰকাৰৰ ব্যৰ্থতা ঢাকিবলৈ ধৰ্মীয় মেৰু বিভাজনৰ নিকৃষ্ট ৰাজনীতিত নামি পৰিছে।