বিলাসীপাৰা, 5 অক্টোবৰ:বিলাসীপাৰাৰ ভেৰভেৰীত মঙলবাৰে সংঘটিত হয় এক নৃশংস হত্যাকাণ্ড ৷ সুৰাপান কৰাৰ ঘটনাক কেন্দ্ৰ কৰি ভেৰভেৰী গাঁৱৰ তিনি ভাতৃয়ে হাতুৰী, বটালী আৰু লোৰ ৰ'ডেৰে কোৱাই হত্যা কৰে মুছিল ৰায় নামৰ এজন 42 বছৰীয়া লোকক ৷ মদ্যপান কৰাক কেন্দ্ৰ কৰি দুটা পক্ষৰ মাজত হোৱা কাজিয়াত প্ৰাণ যায় লোকজনৰ ৷
ঘটনা অনুসৰি, কচলতটাৰী প্ৰথম খণ্ডৰ ভেৰভেৰী গাঁৱৰ সঞ্জয় ৰায়ৰ ঘৰত কালিদাস ৰায়ৰ লগত মদ্যপান কৰি আছিল মুছিল ৰায় ৷ পৰৱৰ্তী সময়ত কালিদাসৰ তিনি পুত্ৰ ক্ৰমে বিকাশ ৰায় (24) সুভাষ ৰায় (26) আৰু প্ৰকাশ ৰায়ে (22) পিতৃক বিছাৰি সঞ্জয় ৰায়ৰ ঘৰত উপস্থিত হয় | তাতে মদ্যপান কৰাক কেন্দ্ৰ কৰি মুছিল ৰায়ৰ সৈতে তৰ্কা-তৰ্কিৰ সূত্ৰপাত হয় ৷ পৰৱৰ্তী সময়ত এই তৰ্কা-তৰ্কি পৰ্যবসিত হয় মাৰপিটলৈ ৷ এই মাৰপিটৰ ঘটনাতে বিকাশ ৰায়ৰ প্ৰহাৰত থিতাতে মৃত্যু হয় মুছিল ৰায়ৰ ৷ ঘটনাস্থলীত পাচত সাপটগ্ৰাম আৰক্ষীসহ বিলাসীপাৰা মহকুমাৰ দণ্ডাধীশ কৃতিকা বসুমতাৰী উপস্থিত হৈ মৃতদেহটো উদ্ধাৰ কৰে | ঘটনাত জড়িত থকাৰ অভিযোগত সাপটগ্ৰাম আৰক্ষীয়ে আটক কৰিছে হত্যাকাৰী তিনি ভাতৃক | ঘটনাক লৈ অঞ্চলজুৰি সৃষ্টি হৈছে ব্যাপক চাঞ্চল্যৰ ৷